Սիրիան, Իրանը և Եվրագոտու ճգնաժամը` Մյունխենի անվտանգության խորհրդակցության օրակարգում. Deutsche-Welle

Միջազգային ճգնաժամային օջախներ հանդիսացող երկրները դրվել են Գերմանիայի Մյունխեն քաղաքում այսօր մեկնարկող անվտանգության քաղաքականության հարցերով խորհրդակցության օրակագում: Առաջին քննարկումները, սակայն, տնտեսական բնույթ են կրելու և վերաբերելու են եվրագոտու ճգնաժամին. գրում է Deutsche-Welle-ն:

Մյունխենում կայանալիք 49-րդ անվտանգության խորհրդակցությանը հանդիպելու են քաղաքական գործիչներ և փորձագետներ ամբողջ աշխարհից: Եռօրյա հանդիպումների ժամանակ սպասվում է տասնյակ երկրների կառավարությունների ղեկավարների, շուրջ 70 արտաքին գործերի և պաշտպանության նախարարների, 5 եվրահանձնակատարների, 60 պատգամավորների հանդիպումը: Ընդհանուր առմամբ՝ խորհրդակցությանը մասնակցելու է 90 պատվիրակություն՝ 20 ով ավել, քան նախորդ տարի:

Խորհրդակցության կարևորագույն հյուրն է ԱՄՆ-ի փոխնախագահ Ջո Բայդենը, ով Բարաք Օբամայի նոր կառավարության արտաքին քաղաքական հիմնական կուրսի մասին ելույթ պետք է ունենա: Խորհրդակցությանը մասնակցելու է նաև ՄԱԿ-ում և Արաբական պետությունների լիգայում Սիրիայի հատուկ ներկայացուցիչ Լախդար Բրահիմին, Իրանի արտգործնախարար Ալի Աքբար Սալեհին և սիրիական ընդդիմության ներկայացուցիչները:

Խորհրդակցությունը բացվելու է եվրագոտու ճգնաժամին և էներգետիկ հարցերին նվիրված նիստով:

Շաբաթ օրը ակնկալվում է օրակարգում դիտարկել Սիրիայի ճգնաժամը: Շաբաթ օրը կայանալիք խորհրդակցությունն ամբողջովին նվիրված է լինելու անվտանգության քաղաքականության հարցերին, որի ժամանակ ելույթ կունենա ՆԱՏՕ-ի գլխավոր քարտուղար Անդերս Ֆոգ Ռասմուսենը և Եվրամիության արտաքին քաղաքական հարցերով լիազոր ներկայացուցիչ Քեթրին Էշթոնը:

Կիրակի օրը եզրափակիչ հանդիպումը նվիրված է լինելու Իրանի միջուկային ծրագրերի շուրջ բանակցություններին: Հատկապես մեծ լարվածություն է սպասվում Իրանի արտգործնախարար Ալի Աքբար Սալեհիի ելույթի ժամանակ:

Մյունխենի անվտանգության խորհրդակցությունը տեղի է ունենում ամեն տարի: Այն պետական մակարդակով չի կազմակերպվում, այլ անհատական նախաձեռնությամբ: Խորհրդակցությունը որևէ հարցի շուրջ վճիռներ կայացնելու նպատակ չի հետապնդում: