Շրջանառվում է ՀԷՑ-ի 100% բաժնետոմսերը գերակա շահ ճանաչելու նախագիծը

«Հայաստանի էլեկտրական ցանցեր» ՓԲ ընկերության 100% բաժնետոմսերի նկատմամբ կճանաչվի հանրության գերակա շահ: Համապատասխան նախագիծը e-draft միասնական հարթակում շրջանառության մեջ է դրել Տարածքային կառավարման և ենթակառուցվածքների նախարարությունը։

Նախագծի հիմնավորման մեջ նշվում է, որ Հայաստանի օրենսդրությունը թույլ է տալիս սահմանափակել սեփականության իրավունքը՝ պահպանելով իրավաչափության, անհրաժեշտության ու համաչափության սկզբունքները, եթե առկա է հանրության գերակա շահ։ Ըստ պետական մարմինների գնահատականի՝ եթե էլեկտրաէներգիայի բաշխման ոլորտում առաջացած խնդիրները վտանգում են հանրային շահը, պետության միջամտությունն իրավաչափ է դառնում: Նախագծում հղում է արվում նաև Սահմանադրությանը, որի համաձայն՝ սեփականության իրավունքը բացարձակ չէ և կարող է սահմանափակվել օրենքով՝ հանրային շահի ապահովման նպատակով։

ՏԿԵ նախարարությունը շեշտում է, որ բաշխիչ ցանցերի գործունեության խափանումը կարող է հանգեցնել տնտեսական, սոցիալական և անվտանգային լուրջ հետևանքների: Հենց սրանով է պայմանավորված պետության սահմանադրաիրավական պարտականությունը՝ միջամտելու հանրային շահի պաշտպանության համար:

Որպես իրավական հիմնավորում՝ նախագծում հատուկ անդրադարձ է կատարվում նաև Հանրային ծառայությունները կարգավորող հանձնաժողովի (ՀԾԿՀ) կողմից ՀԷՑ-ի լիցենզիայի դադարեցման գործընթացի նախաձեռնմանը։ Նախարարության գնահատմամբ՝ սա վկայում է այն մասին, որ արձանագրվել են հնարավոր խախտումներ կամ ռիսկեր, որոնք անմիջականորեն վտանգում են բնակչության անխափան էլեկտրամատակարարումը, սոցիալական ու ռազմավարական նշանակության օբյեկտների բնականոն գործունեությունը, ինչպես նաև էներգետիկ համակարգի կայունությունը։