Գիտնականները հայտնաբերել են բջիջների ծերացման նոր պատճառ

Ենայի Լեյբնիցի անվան ծերացման ինստիտուտի հետազոտողները պարզել են, որ տարիքային բջջային էներգիայի կորստի պատճառներից մեկը ֆոսֆատիդիլխոլինի՝ բջջային թաղանթների կարևոր բաղադրիչի անբավարարությունն է: Այս նյութի համալրումը կարող է արագ վերականգնել միտոքոնդրիաների՝ բջջային «էլեկտրակայանների» գործառույթը: Ուսումնասիրության արդյունքները հրապարակվել են Science Daily-ում:

Տարիքի հետ միտոքոնդրիալ թաղանթները դառնում են պակաս ճկուն, ինչի հետևանքով օրգանոիդները կորցնում են իրենց նորմալ կառուցվածքը, մասնատվում և դառնում են ավելի քիչ արդյունավետ էներգիա արտադրելու հարցում: Հետազոտության առաջատար հեղինակ Մարիա Երմոլաևայի խոսքով՝ խնդիրը ոչ այնքան էներգիայի արտադրության անկման մեջ է, որքան նյութափոխանակության պլաստիկության կորստի՝ բջիջների՝ փոփոխություններին և սթրեսին արագ հարմարվելու ունակության մեջ:

Փորձերի ընթացքում գիտնականները պարզել են, որ սննդակարգը ֆոսֆատիդիլխոլինով կամ դրա նախորդող խոլինով լրացնելը ընդամենը երկու օրով վերականգնում է միտոքոնդրիալ կառուցվածքը երիտասարդ բջիջներին բնորոշ վիճակի: Արդյունքը նկատվել է նույնիսկ այն դեպքում, եթե բուժումը սկսվել է միջին կամ ծեր տարիքում:

Հեղինակները կարծում են, որ ֆոսֆատիդիլխոլինը կարևոր դեր է խաղում միտոքոնդրիալ թաղանթի ճկունության պահպանման գործում, ինչը անմիջականորեն ազդում է էներգիայի նյութափոխանակության արդյունավետության վրա: Ստացված արդյունքները ցույց են տալիս տարիքային բջջային փոփոխությունները դանդաղեցնելու ներուժը՝ թաղանթի լիպիդային կազմը կարգավորելու միջոցով։

Հետազոտողները ընդգծում են, որ չնայած այս արդյունքները դեռևս սահմանափակվում են ծերացման հիմնարար մեխանիզմներով, իրենց հայտնագործությունը կարող է հիմք հանդիսանալ բջջային էներգիայի պահպանման և առողջ ծերացման խթանման նոր մոտեցումների մշակման համար։

Թարգմանությունը՝ Lurer.com-ի