Բարեկամության շքանշան՝ Բրիս Ռոքֆոյին. Փարիզում արժևորել են ֆրանսիացի դիվանագետի ավանդը

Հունիսի 22-ին Ֆրանսիայում Հայաստանի Հանրապետության դեսպանությունում տեղի է ունեցել Ֆրանսիայի Եվրոպայի և արտաքին գործերի նախարարության Մայրցամաքային Եվրոպայի վարչության տնօրեն Բրիս Ռոքֆոյի՝ ՀՀ Բարեկամության շքանշանի հանձնման հանդիսավոր արարողությունը։ Այս մասին հայտնում են Ֆրանսիայում ՀՀ դեսպանությունից։

 

«Շնորհավորական խոսքով հանդես եկավ Ֆրանսիայում ՀՀ դեսպան Արման Խաչատրյանը, որը կարևորեց Բրիս Ռոքֆոյի էական ավանդը վերջին տարիներին հայ-ֆրանսիական բարեկամության ամրապնդման, Հայաստանի և Ֆրանսիայի միջև ռազմավարական գործընկերության հաստատման գործում, ինչի վերաբերյալ հռչակագիրը երկու երկրների ղեկավարները ստորագրել էին մայիսի 5-ին՝ նախագահ Մակրոնի՝ Հայաստան կատարած պետական այցի ընթացքում։

 

Ելույթ ունեցավ նաև վարչության տնօրեն Բրիս Ռոքֆոյը, որը շնորհակալություն հայտնեց այս բարձր պարգևի համար և վերահաստատեց իր հանձնառությունը շարունակելու աշխատանքը՝ ի նպաստ Հայաստանի և Ֆրանսիայի միջև համագործակցության հետագա ամրապնդման։

 

Ընդունելությանը ներկա էին ՀՀ արտաքին գործերի նախարարի տեղակալ Ռոբերտ Աբիսողոմոնյանը, Ֆրանսիայում հավատարմագրված դեսպաններ, Ֆրանսիայի Եվրոպայի և արտաքին գործերի նախարարության ներկայացուցիչներ, ինչպես նաև Բրիս Ռոքֆոյի ընտանիքի անդամները»- ասվում է հաղորդագրությն մեջ։