Google-ը գործարք է կնքել Ֆրանսիայի հետ` գնելով իր հարկային ազատությունը. Der Spiegel

Սա պատմական գործարք է: Իր ֆոնդից Google ինտերնետային հսկան 60 մլն եվրո գումար է վճարելու ֆրանսիական պարբերականների և խմբագրությունների օնլայն լրատվական նախագծերի համար և դրանով խուսափում է Ֆրանսիայում մեծահարուստների համար հատուկ սահմանված ահռելի հարկերից. գրում է Der Spiegel-ը: Google-ի ղեկավար Էրիկ Շմիդթն ու Ֆրանսիայի նախագահ Ֆրանսուա Օլանդը համաձայնություն են ստորագրել:

Ուրբաթ օրը Ֆրանսուա Օլանդի և Google-ի տնօրենների խորհրդի նախագահ Էրիկ Շմիդթի միջև ստորագրված համաձայնությամբ Google-ը 60 մլն եվրո է վճարելու ֆրանսիական նոր օնլայն լրատվական նախագծի իրագործման համար, որը կօգնի խմբագրություններին և պարբերականներին իրականացնել իրենց վեբ-կայքերի մարքեթինգն ու գովազդը:

«Հատկացվող գումարի շնորհիվ հնարավոր կլինի անցում կատարել թվայնացված համակարգի»,-ասել են Ֆրանսուա Օլանդի աշխատակազմի ներկայացուցիչները: Օլանդը խոսել է գործարքի մասին որպես համաշխարհային իրադարձություն և ասել. «Այս համաձայնությունը շահավետ է ֆրանսիական մամուլի, նրա բովանդակության, ինչպես նաև Google-ի համար»,-ասել է նա: Իր հերթին էրիկ Շմիդթը նշել է, որ այդ պատմական համաձայնությունը շահավետ է Ֆրանսիայի ազգաբնակչության համար: