Ատամնաբույժը ներկայացրել է ատամները ճիշտ մաքրելու 5 հիմնական կանոնները

Ռուսաստանում ատամնաբույժ Ելենա Տեն նշել է ատամների խնամքի հիմնական կանոնները՝ ընդգծելով, որ ճիշտ հիգիենան ոչ միայն պաշտպանում է ատամները, այլ նաև կանխում է լնդերի հիվանդությունները։ Նրա խոսքով՝ ամենակարևորը ճիշտ խոզանակի ընտրությունն է և մաքրման տեխնիկայի պահպանումը։

Մասնագետի խորհուրդներով՝ պետք է օգտագործել փափուկ կամ միջին կարծրության փոքր գլխիկով խոզանակ, քանի որ կոշտ խոզանակը վնասում է էմալը և լնդերը։ Ատամները պետք է մաքրել «ավլելու» տեխնիկայով՝ 45 աստիճան անկյան տակ՝ շարժումները կատարելով լնդից դեպի ատամ։ Յուրաքանչյուր ատամի վրա խորհուրդ է տրվում կատարել 3–5 կրկնություն՝ մաքրելով նաև ներսի, դրսի և ծամող մակերեսները։

Բժշկի խոսքով՝ ատամների մաքրումը պետք է տևի առնվազն 2–3 րոպե, իսկ օրական մեկ անգամ պարտադիր է օգտագործել ատամնաթել, քանի որ այն մաքրում է այն հատվածները, որտեղ խոզանակը չի հասնում։ Մասնագետը զգուշացրել է՝ առանց ատամնաթելի կարող է չմաքրվել ատամների մոտ 40%-ը, ինչը մեծացնում է կարիեսի և բորբոքման ռիսկը։