Ուկրաինան առաջին անգամ ստացել է հսկայական ծավալի կրիպտոակտիվներ՝ ավելի քան 8 միլիոն USDT

Ուկրաինայի գլխավոր դատախազությունը հայտնել է, որ Կիևը առաջին անգամ իր կառավարման տակ է ստացել 8,3 միլիոն USDT արժողությամբ կրիպտոակտիվներ, որոնք նախկինում առգրավվել էին հաքերներից։ Գումարը համարժեք է մոտ 750 միլիոն ռուսական ռուբլու։

Հայտարարության համաձայն՝ միջոցները փոխանցվել են ակտիվների որոնման և կառավարման պետական գործակալության կրիպտո-դրամապանակին։ Նշվում է, որ սա առաջին դեպքն է, երբ կալանքի տակ գտնվող կրիպտոակտիվները փաստացի փոխանցվում են պետության կառավարմանը։

Իրավապահների տվյալներով՝ այդ միջոցները առգրավվել են միջազգային հաքերային խմբավորումից, որը կիբերհարձակումներ էր իրականացնում Եվրոպայի և ԱՄՆ-ի քաղաքացիների ու ընկերությունների դեմ։ Միաժամանակ մասնագետները կրկին զգուշացնում են, որ կրիպտոարժույթները բարձր ռիսկային ակտիվներ են և պահանջում են զգուշավոր ներդրումային մոտեցում։