Խոսիր քաղաքավարի. Մեսսին նկատողություն է արել պորտուգալացի մրցավարին

Արգենտինայի ազգային հավաքականի ավագ Լիոնել Մեսսին ԱԱ-2026-ի քառորդ եզրափակիչի՝ Շվեյցարիայի դեմ խաղի (3:1՝ լրացուցիչ ժամանակում) ընթացքում դժգոհություն է հայտնել հանդիպման գլխավոր մրցավար, պորտուգալացի Ժոաու Պինեյրուի աշխատանքից և շփման ոճից։

ԱՄՆ-ի Կանզաս-Սիթի քաղաքում կայացած գերլարված դիմակայության դրվագներից մեկում արգենտինացիների առաջատարը չի հանդուրժել մրցավարի տոնը և կոշտ զրույց է ունեցել նրա հետ: Ինչպես հայտնում է արգենտինական հեղինակավոր TyC Sports պարբերականը, Մեսսին դաշտում բառացիորեն հետևյալն է ասել Պինեյրուին.

«Խոսիր քաղաքավարի, անհարգալից վերաբերմունք մի ցուցաբերիր։ Խոսիր ինձ հետ հարգանքով, ինչպես ես եմ քեզ հետ քաղաքավարի խոսել»։

Հիշեցնենք, որ այս խաղում Պինեյրուն VAR-ի միջամտությունից հետո 72-րդ րոպեին սիմուլյացիայի համար երկրորդ դեղին քարտն էր ցույց տվել և դաշտից հեռացրել շվեյցարացի Բրել Էմբոլոյին, ինչից հետո Արգենտինան լրացուցիչ ժամանակում կարողացավ երկու գնդակ խփել և հաղթանակ կորզել:

ԱԱ-2026-ի կիսաեզրափակիչում Լիոնել Սկալոնիի գլխավորած թիմը կմրցի Անգլիայի հավաքականի հետ։ Այս սկզբունքային դիմակայությունը կկայանա հուլիսի 15-ին Ատլանտայում. հանդիպման մեկնարկային սուլիչը կհնչի Երևանի ժամանակով 23:00-ին: