Ես երբևիցե չեմ կառչել որևէ քաղաքական պաշտոնից. Սերժ Սարգսյանի հարցազրույցը Огонёк պարբերականին

Հայաստանի ներքաղաքական իրավիճակների, այս ամիս սպասվող ընտրությունների մասին Огонёк պարբերականը զրուցել է ՀՀ նախագահ Սերժ Սարգսյանի հետ: 

Սերժ Սարգսյանը, պատասխանելով ամսագրի այն հարցին, թե ինչով է պայմանավորված Ռոբերտ Քոչարյանի հայտարարությունը, համաձայն որի` «Հայաստանում փոխզիջման որոնումը արտահայտվում է մանրածախ առևտրի տեսքով, իսկ ընտրություններում քաղաքական մրցակցությունը տիկնիկային բնույթ է ստացել», պատասխանել է. «Իհարկե, ես չեմ մեկնաբանի այս ընթացքում հնչած քաղաքական տարբեր հայտարարությունները, քանի որ դրանք կատարված են անհատական շահերից ելնելով: Ինչ վերաբերում է քաղաքական իրավիճակին, ապա այն ճիշտ այնպիսին է, ինչպիսին կարելի է ակնկալել ժողովրդավարական հանրապետություններում ընտրություններից առաջ: Մարդիկ ուշադրությամբ հետևում են ընտրարշավին, որին մասնակցում են արժանի քաղաքական գործիչներ: Ես՝ որպես ընտրությունների թեկնածու, օգտվում են ընտրարշավի համար նախատեսված բոլոր օրինական հնարավորություններից: Բոլոր թեկնածուների համար կան ընտրարշավի հավասար պայմաններ, և ոչ մեկ նրանց համար խոչընդոտներ չի ստեղծում: Երկրում արդեն աշխատում են միջազգային դիտորդները»,-ասել է ՀՀ նախագահը:

ՀՀ նախագահը Լեռնային Ղարաբաղի մասին տված հարցին պատասխանել է, որ Լեռնային Ղարաբաղի ժողովրդի պայքարն ազգային-ազատագրական պայքար է: «Ժողովուրդը, որին Ստալինը հրամայել էր դառնալ Ադրբեջանի մի հատված, երբևիցե չի ընդունել այդ հրամանը: Արցախի բնակչությունն ինքը պետք է որոշի ինչ ստատուս կրել ապագայում: Այսօր Ադրբեջանի կառավարությունը մշտապես ահաբեկում է մեզ պատերազմով, այսօր ադրբեջանական կառավարությունը ազատ է արձակում հայ քնած սպային կացնով սպանած մարդասպանին, նրան տալիս հերոսի կոչում: Հայաստանի և հայ ժողովրդի նկատմամբ ատելությունը դարձել է պաշտոնական Բաքվի ներքին քաղաքականության օրակարգային հարցը: Էական է տարածաշրջանում հաստատել սպառազինության հսկման միջազգային չափանիշներ, քանի որ Ադրբեջանը, խախտելով Եվրոպայում սովորական զինված ուժերի մասին պայմանագիրը, մտել է սպառազինման մրցավազքի մեջ: Մենք շարունակում ենք բանակցությունները Ադրբեջանի հետ: Սակայն ԵԱՀԿ Մինսկի խմբի համանախագահները լավ են հասկանում, թե ում մեղքով ոչ մի առաջընթաց չի արձանագրվում»,-նշել է Սերժ Սարգսյանը: 

Ընտրությունների կանխատեսումների վերաբերյալ հարցին Սարգսյանը պատասխանել է. «Չնայած կանխատեսումները դրական են, սակայն պետք է դեռ նաև հաղթել ընտրությունների ժամանակ: Ես երբևիցե չեմ կառչել որևէ քաղաքական պաշտոնից և չեմ ծրագրել իմ կարիերայի աճը: Նախագահները երբեք նախկին չեն լինում: Անգամ հեռանալուց հետո նախկին ղեկավարը շարունակում է մեծ հասարակական և պետական պատասխանատվություն կրել: Կարծում եմ` ես դեռ ժամանակ ունեմ այդ պատասխանատվության իրացման ճիշտ ձև որոնելու համար»: