Զելենսկին ԱՄՆ-ին նոր առաջարկներ է փոխանցել և Վաշինգտոնից ավելի մեծ ներգրավվածություն է ակնկալում

Ուկրաինայի նախագահ Վոլոդիմիր Զելենսկին կոչ է արել ԱՄՆ-ին ավելի ակտիվ ներգրավվել ուկրաինական հակամարտության կարգավորման դիվանագիտական գործընթացում։ CNN-ին տված հարցազրույցում նա հայտարարել է, որ Կիևը Վաշինգտոնին խաղաղ կարգավորման վերաբերյալ նոր առաջարկներ է փոխանցել։ Այս մասին գրում է Gazeta.ru-ն։

«Մեզ անհրաժեշտ է ամերիկյան կողմի ավելի մեծ մասնակցությունը խաղաղության ծրագրին։ Ես շնորհակալ եմ նախագահ Դոնալդ Թրամփի թիմին, որ նրանք ցանկանում են շարունակել այդ գործընթացը»,- ասել է Զելենսկին։ Միաժամանակ նա բացառել է ուկրաինական զինված ուժերի դուրսբերումը Դոնբասի՝ Կիևի վերահսկողության տակ մնացած հատվածից։

Ուկրաինայի նախագահի խոսքով՝ Կիևի համար առանցքային հարցերից մեկը անվտանգության երաշխիքներն են։ Ավելի վաղ Զելենսկին նաև կոչ էր արել ԱՄՆ-ին ճնշում գործադրել Ռուսաստանի վրա՝ հակամարտության ավարտին հասնելու համար։ Հուլիսին նա հայտնել էր, որ ամերիկյան կողմը կարգավորման վերաբերյալ մի քանի նոր առաջարկ է նախապատրաստում։