ԱՄՆ-ում աշխատանքի դիմորդին խնդրել են Կիմ Չեն Ընին «գեր և տգեղ խոզ» անվանել

ԱՄՆ-ում աշխատանքի ընդունման հարցազրույցի ժամանակ թեկնածուին խնդրել են ասել, որ Հյուսիսային Կորեայի առաջնորդ Կիմ Չեն Ընը «գեր և տգեղ խոզ է»։ Այս տեսարանով է սկսվում The Wall Street Journal-ի վավերագրական ֆիլմը՝ ամերիկյան ընկերություններում աշխատանքի ընդունվող ենթադրյալ հյուսիսկորեացի գործակալների մասին։

Հարցազրուցավարի խոսքով՝ իրենք բազմաթիվ կեղծ թեկնածուների են հանդիպում, հատկապես՝ Հյուսիսային Կորեայից, որոնք ներկայանում են այլ մարդկանց անուններով։ Նման դիմորդներին բացահայտելու փորձերից մեկն էլ Կիմ Չեն Ընի հասցեին վիրավորական արտահայտություն կրկնել խնդրելն է։ Տվյալ թեկնածուն հարցին հստակ չի պատասխանել։

WSJ-ի պնդմամբ՝ վերջին տարիներին Հյուսիսային Կորեան հազարավոր բարձր որակավորում ունեցող աշխատակիցների է ներգրավել արևմտյան ընկերություններում աշխատանքի։ Պարբերականի տվյալներով՝ ԿԺԴՀ-ի հետ կապվող աշխատակիցները ամերիկյան ընկերություններում աշխատելով վաստակել են շուրջ 800 միլիոն դոլար, որի մի մասը, ըստ WSJ-ի, փոխանցվել է Հյուսիսային Կորեայի իշխանություններին։