«Լեբեդևը վաղուց ոսկոր է՝ Կրեմլի կոկորդին». Business Week

Փետրվարի 7-ին տեղի է ունենալու ռուս մագնատ Ալեքսանդր Լեբեդևի դատավարությունը, ով մեղադրվում է խուլիգանության մեջ: Այս մասին նշում է  Business Week պարբերականը: Հիշեցնելով հեռուստահաղորդման ժամանակ Լեբեդևի հարձակումը Սերգեյ Պալոնսկու վրա, լրագրող Հենրի Մեյերը նշում է, որ Լեբեդևը շուտվանից ոսկոր է Կրեմլի կոկորդի համար, իսկ հիմա նրա ընդդիմության ձայնը կարող է լռեցվել: 

Բացի այդ, ձերբակալությունը նոր վնասներ կարող է բերել Լեբեդևին: Վերջին երկու տարվա ընթացքում նրա կարողությունը նվազել է 2 մլրդ դոլարից մինչ մի քանի հարյուր միլիոն դոլար՝ իշխանության վրա ճնշումների պատճառով: Պուտինի համար Լեբեդևի ձերբակալությունը կնշանակի ևս մեկ հարուստ ընդդիմադիր գործչի խաղից դուրս գալ: 

Վերջին վեց տարվա մեջ Լեբեդևը զայրացրել է Կրեմլին կոռուպցիայի և դեմոկրատիայի դիֆիցիտի դեմ պայքարով` մասնավորապես  Новая Газета անկախ պարբերականի միջոցով: 

«Պուտինյան Ռուսաստանում բիզնեսը կարող է լինել վտանգավոր զբաղմունք»,- նշում է հոդվածի հեղինակը` հղում կատարելով Transparency International-ի վարկանշային աղյուսակին, համաձայն որի՝ 2012 թվականին ենթադրյալ կոռուպցիայի քանակով Ռուսաստանը գրավում է 133 տեղը Ուգանդայից և Նիկարագուայից հետո: «Հիմնական խնդիրը մակաբույծ վարչական ապարատն է, որը գազանավարի հետապնդում է բիզնեսը»: 

Հոդվածի հեղինակը նաև նշում է, որ Պուտինի վերընտրվելուց հետո սկսվել են նշանավոր ընդդիմադիր գործիչների ձերբակալությունները` օրինակ բերելով Ալեքսեյ Նավալնիին: Վերջին միլիարդատերը, որին ձերբակալել էր Պուտինը, եղել է Խոդորկովսկին: