Յասեր Արաֆատի այրին զղջում է նրա հետ ամուսնանալու համար

Պաղեստինի նախկին առաջնորդ Յասեր Արաֆատի այրին խոստովանել է, որ Արաֆատի հետ ամուսնանալը նրա ամենամեծ սխալն է եղել. գրում է թուրքական Sabah թերթը:

Պարբերականին տված հարցազրույցի ժամանակ տիկին Արաֆատը հայտարարել է, որ չնայած այն բանին, որ սիրել է և մինչև հիմա էլ շարունակում է սիրել իր ամուսնուն, նրա հետ իր ամուսնությունը սխալ քայլ էր, և ինքը զղջում է դրա համար: Կնոջ խոսքերով՝ ինքը հարյուր անգամ փորձել է հեռանալ ամուսնուց, սակայն Յասեր Արաֆատը նրան բաց չէր թողում:

1990-ին զույգը գաղտնի ամուսնացել էր Թունիսում: Այն ժամանակ հարսնացուն 27 տարեկան էր, իսկ Արաֆատը՝ 61:

Հարսնացուն քրիստոնյա է եղել և ամուսնությունից առաջ էր միայն իսլամ ընդունել: Տիկին Արաֆատը բողոքում է, որ ամբողջ կյանքում իզոլացված և փախստականի կյանք է վարել՝ անվտանգության նկատառումներից ելնելով: