Հայրիկյանի մահափորձը խախտեց Հայաստանում նախագահական ընտրությունների ընթացքը. Der Standard

Համաշխարհային Մամուլ 11 Փետրվար, 2013 15:17

Ավստրիական Der Standard պարբերականն անդրադարձ է կատարել Հայաստանում նախագահական ընտրություններին և այդ կապակցությամբ լայնածավալ հոդված նվիրել նախագահի թեկնածու Պարույր Հայրիկյանի նկատմամբ կատարված մահափորձին:

Հոդվածագիր Մարկուս Բերնաթը գրում է. «Հայաստանում նախագահի թեկնածուներից մեկը հացադուլ է հայտարարել մայրաքաղաք Երևանի կենտրոնում՝ արդեն քանի շաբաթ գիշերելով փողոցում, իսկ մյուսը, մահափորձի արդյունքում թիկունքից վիրավոր, դիմում էր ներկայացրել Սահմանդրական դատարան՝ ընտրությունները հետաձգելու խնդրանքով՝ այդպիսով ցանկանալով մի քանի ժամ շահել: Այս «փոքրիկ» թեկնածուների հաղթանակի հավանակությունը մեծ չէ: Օրինակ՝ Հայրիկյանի հաղթանակի հավանականությունը հարցումների արդյուքնում գնահատվում է 5%: Իսկ «մեծ» թեկնածուն, ով, ամենայն հավանականությամբ, հաղթանակ է տոնելու, գործող նախագահ Սերժ Սարգսյանն է, որի հաղթանակն արդեն հենց առաջին փուլով հավանական է թվում: Իհարկե, միայն երբ ավարտվեն ընտրությունները, այդ մասին արդեն ԿԸՀ-ն վստահ կհայտարարի:

Ընտրություններից մեկ շաբաթ առաջ նախագահի մյուս թեկնածուն՝ Անդրեաս Ղուկասյանը, Գիտությունների ակադեմիայի շենքի մոտ վրան է խփել և հունվարի 21-ից մեկնարկած իր նախընտրական քարոզարշավը նման կերպով է արտահայտում: 42-ամյա թեկնածուն ԿԸՀ-ից պահանջում է հանել Սարգսյանի անունը թեկնածուների ցուցակից:

Ինչ վերաբերում է Սերժ Սարգսյանին, ապա նրա գլխին կուտակված են մնում նախորդ՝ 2008թ. ընտրություններից հետո ընտրախախտումների դեմ բողոքող ցուցարարների տասնյակ զոհերի արյան մութ ամպերը: Սերժ Սարգսյանի ղեկավարությամբ Հայաստանը զարգացման շատ դանդաղ ուղի բռնեց, որը հետևանք էր 2009թ. բռնկված համաշխարհային ֆինանսական տնտեսական ճգնաժամի, ինչը հատկապես ավել շատ վնաս հասցրեց Հայաստանին, քան նրա նկատմամբ թշնամաբար տրամադրված հարևաններ Թուրքիային և Ադրբեջանին: Սարգսյանի հնարավոր լուրջ հակառակորդները մեկը մյուսի հետևից ինքնաբացարկ հայտարարեցին: Ընդդիմադիր ՀԱԿ առաջնորդ 68-ամյա Լևոն Տեր-Պետրոսյանը, պատճառաբանելով իր տարիքային շեմը, հրաժարվեց դնել իր թեկնածությունը: Իր թեկնածությունը չառաջադրեց նաև երկրի ամենահարուստ մարդկանցից մեկը, «Բարգավաճ Հայաստան» կուսակցության առաջնորդ Գագիկ Ծառուկյանը: Իսկ Ծառուկյանի կուսակից, թեկնածուի լուրջ հավակնորդ, նախկին արտգործնախարար Վարդան Օսկանյանի նկատմամբ կառավարությունը դատական գործընթաց է ծավալել:

Այսպիսով՝ մնում է նախագահի միայն մեկ՝ քիչ թե շատ հավանական թեկնածու՝ անկախ Հայաստանի առաջին արտգործնախարար 53-ամյա Րաֆֆի Հովհանիիսյանը՝ պատմաբան Ռիչարդ Հովհաննսիյանի որդին: Տարիներ շարունակ նրա թեկնածությունը մերժվում էր կառավարող ռեժիմի կողմից, քանի որ Հովհաննիսյանը բավականաչափ չէր ապրել Հայաստանում: Այժմ նա փորձում է հավաքել Սարգսյանին ընդդիմադիր ձայները: Նրա հաղթանակի հավանականությունը գնահատվում է 30%»,-եզրափակում է հոդվածագիրը: