British Airways-ի բորտ-ուղեկցորդներն օդանավում անկարգություններ են կազմակերպել

British Airways ավիաուղիների բորտ-ուղեկցորդները հարբած վիճակում անկարգություններ են սադրել Լոնդոնից Վաշինգտոն մեկնող օդանավում. գրում է Daily Mail-ը:

Ուղեկցորդներն ու ուղեկցորդուհիները հայտնաբերվել են առաջին կարգով թռչող ուղևորների կողմից գինի և շամպայն խմելիս: 11.7 հազար դոլար վճարած ուղևորները թռիչքի ողջ ընթացքում չեն կարողացել քնել նրանց բարձրացրած աղմուկի և պատճառած անհանգստության պատճառով:

Ականատեսների վկայությամբ՝ ուղեկցորդները գոռում էին և աղմկում, վազում օդանավի սրահով մեկ, վայր ընկնում ու խանգարում ուղևորներին: Որոշ ուղևորներ նշել են, որ ուղեկցորդներից ոմանք համբուրվում էին բոլորի ներկայությամբ:

Միջադեպը տեղի էր ունեցել հունվարի վերջին, սակայն այս մասին լուրերը հանրությանը մատչելի էին դարձել միայն օրերս: 

Ավիաուղիների ղեկավարությունը ներողություն է խնդրել պատճառած անհանգստության համար: