ԱՄՆ-ը կարող է զինել Սիրիական ընդդիմությանը. Washington Post

Բարաք Օբամայի վարչակազմը դիտարկում է Սիրիայում ընթացող իրադարձություններին իր մոտեցման վերանայման հարցը և շուտով հնարավոր է որոշում ընդունեի սիրիական ընդդիմությանը ռազմական օգնություն ցուցաբերելու մասին:

Ինչպես լրագրողներին հայտնել են ամերիկյան պաշտոնական անձինք, ովքեր ուղեկցում էին պետքարտուղար Ջոն Քերիին Եվրոպայով կատարվող նրա շրջայցի շրջանակներում, հնարավոր է էական շրջադարձ տեղի ունենա Սիրիայի նկատմամբ ամերիկյան քաղաքականության մեջ՝ սիրիացի ապստամբներին մատակարարելով զրահամեքենաներ և զրահաբաճկոններ:

«ԱՄՆ-ի պաշտոնական անձինք զգուշացրել են, որ այս քաղաքականության բոլոր տարրերը պետք է քննարկվեն Քերիի և Եվրոպայի ու Մերձավոր Արևելքի իր դաշնակիցների հետ», գրում է Washington Post-ը:

Քերին հայտարարել էր, որ Վաշինգտոնը կցանկանար հասնել հարցի`խաղաղ բանակցությունների միջոցով կարգավորմանը, սակայն եթե դա չհաջողվի, ապա ստիպված կլինի որևէ աջակցություն ցուցաբերել Բաշար Ասադի ռեժիմի դեմ պայքարող ապստամբներին:

ԱՄՆ-ը մինչ այժմ վարում էր Սիրիայի կոնֆլիկտին սահմանաևափակ միջամտության քաղաքականություն`ցուցաբերելով ապստամբներին քաղաքական աջակցություն և մատակարարելով նրանց կապի միջոցներ, սակայն ոչ զինամթերք և ռազմական տեխնիկա: