Forbes-ը կազմել է աշխարհում հայ միլիարդատերերի ցուցակը

Քըրք Քըրքորյանը, ով տարիներ շարունակ համարվում էր աշխարհում ամենահարուստ հայազգի գործարարը, այս տարի իր տեղը զիջել է Ռուսաստանում գործունեություն ծավալող Սամվել Կարապետյանին: Այս մասին վկայում է Forbes-ի կազմած միլիարդատերերի նոր ցուցակը:

Հայաստանի հյուսիսում՝ Տաշիրում ծնված 47-ամյա Սամվել Կարապետյանի ունեցվածքը, ով հայտնի է որպես «Տաշիր» ընկերության սեփականատեր, Forbes-ը գնահատել է 3.8 մլրդ դոլար, ինչը 2.4 անգամ գերազանցում է նրա՝ անցյալ տարվա ցուցանիշը՝ 1.6 մլրդ դոլար: Եթե հավատանք Forbes-ի տեղեկություններին, ապա Սամվել Կարապետյանը մեկ տարում իր կապիտալն ավելացրել է 2.2 մլրդ դոլարով:

Առավել գունավոր տեսարան ստանալու համար նշենք, որ Սամվել Կարապետյանի ունեցվածքը գերազանցում է Հայաստանի պետական բյուջեն, որը 2013-ին կազմել է 2.5 մլրդ դոլար. գրում է Novostink-ը:

Քըրք Քըրքորյանի ունեծվածքը ամսագիրը գնահատել է 3.3 մլրդ դոլար՝ չնշելով անցյալ տարվա համեմատ կարողության ոչ մի փոփոխություն:

2008թ. Քըրքորյանի ունեցվածքը գնահատվում էր 11.2 մլրդ դոլար:

Forbes-ի ցուցակում, Կարապետյանից և Քըրքորյանից բացի, հայտնվել է ևս 3 միլիարդատեր հայ, ովքեր իրենց գործունեությունը ծավալել են Ռուսաստանում ապահովագրական ոլորտում:

Դանիլ Խաչատուրովի ունեցվածքը, ով ապահովագրական ընկերությունների հսկաներից մեկի՝ «Росгосстрах»-ի հիմնական բաժնետերն է, Forbes-ը գնահատել է 2.4 մլրդ դոլար, որը 0.4 մլրդ դոլարով գերազանցում է անցյալ տարվա ցուցանիշը:

Մյուս հայազգի միլիարդատերերը Սարգիսով եղբայրներն են, ովքեր նույնպես հանդես են գալիս ապահովագրական ոլորտում: 53-ամյա Սերգեյ և 44-ամյա Նիկոլայ Սարգիսովների կարողությունը Forbes-ը մի քանի տարի է, ինչ գնահատում է կայուն հավասարաչափ, քանի որ նրանք «Ресо Гарантия» ընկերության համահավասար բաժնետերեր են: Նրանց կարողությունը գնահատվել է 1.35 մլրդ դոլար: Ընդ որում, Forbes-ը չի գտել ոչ մի միլիարդատեր բուն Հայաստանի տարածքում:

Հետխորհրդային շրջանում Ռուսաստանում գրանցվել է 107 միլիարդատերեր, Ուկրաինայում՝ 10, Ղազախստանում՝ 5 և Վրաստանում՝ 1 մարդ՝ վարչապետ Բիձինա Իվանիշվիլին։

Forbes-ի աշխարհի միլիարդատերերի ցուցակը գլխավորում է մեքսիկացի մագնատ Կարլոս Սլիմ Էլուն, ում ունեցվածքը 53.5 մլրդ դոլար է կազմում: Բիլ Գեյթսը, ով նախորդ տարի գլխավորում էր ցուցակը, այս տարի 2-րդն է իր 53 մլրդ դոլարով: