Թուրքերը կոնֆլիկտներ ունեն Patriot հրթիռների հետ ժամանած գերմանացի զինվորներիի հետ

Գերմանական Süddeitsche Zeitung-ը հանդես է եկել սենսացիոն հայտարարությամբ, նշելով, որ Թուրքիայի համար Սիրիայի կողմից ոչ մի լուրջ սպառնալիք չկա: Patriot զենիթա-հրթռիային համակարգերի տեղադրումը Թուրքիայում հստակ նշան է այն բանի, որ չնայած ՆԱՏՕ-ն չի ցանկանում միջամտել Սիրիայի քաղաքացիական պատերազմի ընթացքին, սակայն իր աջակցությունն է հայտնում Թուրքիային: Ընդ որում, պարբերականը նշում է, որ Թուրքիայում գերմանացի զինվորների գոյությունը, մեղմ ասած, անբարեհամբույր կերպով է ընկալվել թուրքերի կողմից:

Այդ մասին կարող էր համոզվել ինքը Անգելա Մերկելը Թուրքիա կատարած իր այցելության ընթացքում, երբ առաջին հերթին նա այցելեց Քահրամանմարաշում գտվող գերմանական ռազմաբազան, ուր կա 300 գերմանացի զինվոր:

Իսկ ինչպես գրում է Der Spiegel-ը, Սիրիայի կողմից հարձակումներ չկան և դժվար էլ թե լինեն, սակայն «թուրքերն իրենց պաշտպաններին վատ են վերաբերում: Հարցը հասել է նույնիսկ այդ մասին կազմած հատուկ զեկույցին, որը քննարկվում է Բունդեսթագում»:

Բանակի հարցերով խորհրդարանի հանձնակատար Հելմուտ Քոնիգհաուզը հայտարարել էր, որ Թուրքիայում գերմանացի զինվորների և տեղի բնակչության միջև հարաբերությունները ծայրահեղ պրոբլեմատիկ բնույթ են կրում:

Թուրք հրամանատարությունն արգելել է իր զինվորներին որևէ շփում ունենալ գերմանացիների հետ, և չենթարկվողները խիստ պատժվում են, իսկ գերմանացի զինվորականներին էլ արգելվել է դուրս գալ բազայի, այսպես կոչված, «կանաչ գոտուց»:

Der Spiegel-ը հայտնում է, որ թուրքերը հրամայել են պոկել բազայի վրա բարձրացված բոլոր գերմանական դրոշները:

Գերմանիայի ՊՆ-ի մամլո քարտուղարը հայտնել է, որ բանակի ղեկավարությունը «շատ լուրջ է վերաբերվում հանձնակատար Քոնիգհաուզի կազմած զեկույցին»:

Հիշեցնենք, որ անցյալ տարվա աշնանը Թուրքիան դիմել էր ՆԱՏՕ-ին խնդրանքով՝ իր տարածքում Patriot հրթիռներ տեղակայել Սիրիայից եկող հնարավոր սպառնալիքներին դիմակայելու համար: