17-ամյա Ենոքը բռնի սեռական հարաբերություն էր ունեցել մտավոր հիվանդ երիտասարդի հետ

Չի բողոքարկվել և ուժի մեջ է մտել Կենտրոն և Նորք-Մարաշ վարչական շրջանների ընդհանուր իրավասության դատարանի 2013 թվականի փետրվարի 1-ի դատավճիռը:

Ամբաստանյալը՝ 1994 թվականի սեպտեմբերի 28-ին ծնված Ենոք Այվազյանը, որ ավարտել էր գիշերօթիկ դպրոցի 7-րդ դասարանը միայն, չափահաս՝ 18 տարեկան դառնալուց 52 օր առաջ՝ 2012 թվականի օգոստոսի 6-ին, ժամը 15-ի սահմաններում, օգտագործել էր իր ծանոթ, 1989 թվականին ծնված, մանկուց երկրորդ խմբի հաշմանդամ, մտավոր հետամնացություն ունեցող Նիկոլայի (անունը փոխված է) անօգնական վիճակը, բռնություն գործադրելու սպառնալիքով Երևանի Հրազդանի կիրճում գտնվող մանկական երկաթուղու մոտակայքում սեռական հարաբերություններ էր ունեցել նրա հետ:

Քրեական գործը հարուցվել էր դեպքի հաջորդ օրը՝ օգոստոսի 7-ին: Նույն օրն էլ Ենոքը ձերբակալվել էր:

Նախաքննական մարմինը նրան մեղադրանք է առաջադրել ՀՀ քրեական օրենսգրքի 139 հոդվածի 1-ին մասով:

Դռնփակ դատական նիստի սկզբում Ենոքը միջնորդել է գործը քննել արագացված ընթացակարգով, որովհետև իրեն լիովին մեղավոր է ճանաչել ու զղջացել կատարածի համար:

Տուժողի օրինական ներկայացուցիչը և մեղադրողը չեն առարկել այդ ընթացակարգի դեմ:

Ճիշտ է, ամբաստանյալը հանցանքը գործել էր անչափահաս տարիքում, սակայն միջնորդությունն անում էր արդեն որպես չափահաս՝ 18-ը բոլորած անձ:

Դատարանը ամբաստանյալի անձը բնութագրող տվյալների շարքում հաշվի առավ այն, որ նրա ծննդյան տարում՝ 1994 թվականին, Ենոքի ծնողները փաստացի ամուսնալուծվել էին: Հայրը դատապարտվել էր: Ենոքը զուրկ էր եղել հոր խնամքից ու դաստիարակությունից:

Դատարանում Ենոքը ներողություն խնդրեց տուժողի օրինական ներկայացուցչից՝ մորից: Վերջինս հայտնեց, թե բողոք չունի, քաղաքացիական հայցի պահանջ չի ներկայացնում:

Ընդհանուր իրավասության դատարանը Ենոք Այվազյանին դատապարտեց 3 տարի ազատազրկման: Պատժի կրման սկիզբը՝ 2012 թվականի օգոստոսի 7-ից: