Կնոջը ծեծել է, մերկացրել և սեքսուալ բնույթի գործողություններ կատարել

Գեղարքունիքի մարզի ընդհանուր իրավասության դատարանը քննության է առել Աբրահամ Խ-ի նկատմամբ հարուցված քրեական գործը: Այս մասին գրում է iravaban.net-ը:

Վերջինին մեղադրանք է առաջադրվել այն բանի համար, որ խոշտանգել է կնոջը՝ Գայանե Թ-ին. պարբերաբար ծեծի ենթարկելով՝ մարմնական և հոգեկան տառապանք է պատճառել նրան:

Այսպես, 2012թ. փետրվարի 10-ի լույս 11-ի գիշերը՝ ժամը 01:00-ի սահմաններում Աբրահամ Խ-ն եղել է Գավառ քաղաքի Ազատության փողոցի 69 շենքի 17 հասցեում գտնվող իրենց բնակարանում, երբ անկողնում պառկած ժամանակ անհիմն պատճառով փոշեծծիչի խողովակով մի քանի անգամ հարվածել է Գայանե Թ-ի սրունքներին:

Այնուհետև 2012թ. փետրվարի 21-ին, երբ Աբրահամ Խ-ն աշխատանքից տուն է վերադարձել, ձեռքով հարվածներ է հասցրել Գայանե Թ-ի մարմնի տարբեր մասերին, որից հետո նույն օրը, ծնողների ներկայությամբ նրան հրել և գցել է գետնին, որի հետևանքով Գայանե Թ-ն ստացել է աջ ծնկի հոդի քերծվածք: Դեպքերն այդքանով չեն սահմանափակվել: 2012թ. փետրվարի 27-ին՝ ժամը 03-ի սահմաններում ննջասենյակ է կանչել կնոջը՝ Գայանե Թ-ին, պահանջել է մերկանալ, շուրջ 10 րոպե մերկ վիճակով կանգնեցրել է մահճակալի մոտ, որից հետո բռնություն գործադրելու սպառնալիքով, ապա նաև բռնություն գործադրելով, նրա կամքին հակառակ հարկադրաբար կատարել է սեքսուալ բնույթի գործողություններ:

Մեղադրյալի նկատմամբ խափանման միջոց է ընտրվել կալանավորումը: