Անչափահասին բռնաբարած գյուղապետը «փրկվեց» արվամոլների խցից

Այսօր օրաթերթերից մեկը տեղեկացրել էր, որ Սյունիքի մարզի Հարթաշեն համայնքի ղեկավար, գյուղի դպրոցներից մեկի ֆիզկուլտուրայի ուսուցիչ Ազատ Ղուկասյանը, ով 2012 թ. փետրվարի 27-ին անչափահասի նկատմամբ բռնաբարության մեղադրանքով դատապարտվեց 8 տարվա ազատազրկման, հայտնվել է արվամոլների պատժախցում: Սակայն Քրեակատարողական հիմնարկների վարչության մամուլի քարտուղար Գոռ Ղլեչյանը Lurer.com-ի թղթակցի հետ զրույցում հերքեց տեղեկատվությունը՝ հավաստիացնելով, որ այդ մարդու հետ ամեն ինչ նորմալ է և կրում է իր պատիժը: 

Գյուղապետ Ազատ Ղուկասյանը դատապարտվել է ՀՀ Քրեական օրենսգրքի 138 հոդվածի 2-րդ մասի 3-րդ կետի (բռնաբարություն, որը կատարվել է անչափահասի նկատմամբ) եւ 142-րդ հոդվածի 1-ին մասի (անառակաբարո գործողություններ 16 տարին չլրացած անձի նկատմամբ) հատկանիշներով: Հարցրեցինք նաև արդյոք հոդվածից ելնելով վերջինս այս պահին ենթարկվում է որոշակի խոշտանգումների, թե՝ ոչ Գոռ Ղլեչյանն ասաց, որ ինքն անձամբ է տեղեկացել, որ Ազատ Ղուկասյանի մոտ այս պահին խնդիրներ չկան:

Նշենք, որ ամեն ինչ սկսվել էր անցյալ տարվա փետրվարին: Համայնքապետ Ազատ Ղուկասյանը, ով միաժամանակ գյուղի դպրոցում ֆիզկուլտուրա էր դասավանդում, 8-րդ դասարանցիների միացյալ դասին երկու դասարանի աշակերտներին տարել էր մարզադահլիճ եւ պատվիրել «խելոք խաղալ»: Իսկ 14-ամյա Կարինեին (անունը փոխված է) գյուղապետը հանձնարարել էր հետեւել իրեն: Ուսուցիչն այդ քայլին դիմել էր մի քանի անգամ, ինչն էլ առիթ էր հանդիսացել, որ աղջկա համադասարանցիները սկսեն կասկածել, հետեւել ու «բռնացնել» ուսուցչին անչափահաս աղջնակի նկատմամբ անառակաբարո գործողություններ կատարելիս: