Տիգրան Եգորյանը կրկին փորձել է ձայնագրառել հարցաքննությունը. ՀՔԾ-ն դիմել է Փաստաբանների պալատին

Ինչպես տեղեկացվել էր, ՀՀ հատուկ քննչական ծառայությունը դիմել է ՀՀ փաստաբանների պալատին՝ խնդրելով քննարկման առարկա դարձնել 2013թ. փետրվարի 18-ին կայացած՝ Հայաստանի Հանրապետության Նախագահի ընտրությունների ընթացքում Արտաշատի թիվ 17/5 ընտրական տեղամասում քվեաթերթիկների լցոնման փաստի առթիվ ՀՀ հատուկ քննչական ծառայությունում քննվող քրեական գործով իր վստահորդ Նարինե Իսմայիլի շահերը մինչդատական վարույթում ներկայացնելու ընթացքում փաստաբան Տիգրան Եգորյանի դրսևորած վարքագիծն ու գործողությունները և նրան կարգապահական պատասխանատվության ենթարկելու հարցը՝ հետագայում նմանատիպ գործողությունների կանխման անհրաժեշտությունից ելնելով:

Ծառայության հաղորդման հիման վրա 2013թ. մարտի 7-ին ՀՀ փաստաբանների պալատի նախագահի որոշմամբ փաստաբան Տիգրան Եգորյանի նկատմամբ՝ Փաստաբանի վարքագծի կանոնագրքի 6.1.1, 6.1.2 և 6.1.3 կետերի պահանջների խախտման հատկանիշներով հարուցվել է կարգապահական վարույթ:

Վերոգրյալից համապատասխան հետևություններ կատարելու և վստահորդի շահերը մինչդատական վարույթում ներկայացնելու ընթացքում իր գործողությունները քրեական դատավարության օրենսգրքի պահանջներին համապատասխան իրականացնելու փոխարեն, փաստաբան Տիգրան Եգորյանը շարունակում է օրենքով արգելված միջոցներով ազդել հիշյալ գործով վարույթն իրականացնող մարմնի վրա£

Մասնավորապես, վերը նշված քրեական գործով մեկ այլ վկա, «Լրագրողներ հանուն մարդու իրավունքների» ՀԿ լրագրող Արտակ Համաբարձումյանը 2013թ. մարտի 12-ին Հատուկ քննչական ծառայություն հարցաքննության է ներկայացել ՀՀ փաստաբանների պալատի փաստաբաններ Լուսինե Հակոբյանի և Տիգրան Եգորյանի հետ:

Վերջինս կրկին սկսել է ձայնագրառել հարցաքննության ընթացքը, ինչի դեմ քննիչն առարկել ու պահանջել է դադարեցնել ձայնագրառումը՝ իրավացիորեն պատճառաբանելով, որ ՀՀ քրեական դատավարության օրենսգրքի 206-րդ հոդվածով նման իրավունք փաստաբանին վերապահված չէ, և որ նման գործողությամբ կարող է խախտվել առանց վարույթն իրականացնող մարմնի թույլտվության նախնական քննության տվյալների հրապարակման անթույլատրելիության սկզբունքը:

Միաժամանակ, փաստաբանին պարզաբանվել է, որ ՀՀ քրեական դատավարության օրենսգրքի 206-րդ հոդվածի 6-րդ մասի համաձայն՝ փաստաբանն իրավունք ունի ներկա գտնվել վկայի հարցաքննությանը, սակայն իրավասու չէ հարցեր տալու վկային կամ մեկնաբանելու նրա պատասխանները, իսկ վկայիª քրեադատավարական օրենքով նախատեսված իրավունքները խախտող հարցեր տալու կամ գործողություններ կատարելու դեպքերում փաստաբանն իրավունք ունի անելու հայտարարություններ, որոնք ներառվում են հարցաքննության արձանագրությունում:

Փաստաբան Տիգրան Եգորյանը կրկին չի ենթարկվել քննիչի օրինական պահանջին, այլ տևական ժամանակ բանավիճել է նրա հետ՝ փորձելով արդարացնել իր անօրինական գործողությունները, և, անտեսելով անգամ իր վստահորդ Արտակ Համբարձումյանի՝ առանց ձայնագրառման ցուցմունք տալու ցանկությունն ու պատրաստակամությունը, չի անջատել ձայնագրիչը, որի պատճառով քննիչը հարկադրված դադարեցրել է հարցաքննությունը:

Այսինքն՝ փաստաբանի՝ վերը նկարագրված գործողությունների արդյունքում կրկին խոչընդոտվել է քննչական գործողության ընթացքը:

Տեղի ունեցած միջադեպի մասին Հատուկ քննչական ծառայությունը գրավոր դիմել է ՀՀ փաստաբանների պալատին՝ փաստաբան Տիգրան Եգորյանի նկատմամբ արդեն իսկ հարուցված կարգապահական վարույթի շրջանակներում վերջինիս վերոհիշյալ գործողությունները նույնպես քննարկման առարկա դարձնելու խնդրանքով: