Նվաստացնելով վանաձորցի անչափահաս աղջկան՝ հասցրել է նրան ինքնասպանության փորձի

Լոռու մարզի ընդհանուր իրավասության դատարանը քննության է առել քրեական գործն ըստ մեղադրանքի Արթուր Կ.-ի: Այս մասին գրել է Iravaban.net-ը։

Վերջինիս մեղադրանք է առաջադրվել այն բանի համար, որ նա սպառնալիքի և անձնական արժանապատվությունը պարբերաբար նվաստացնելու ճանապարհով անուղղակի դիտավորությամբ անչափահաս Արփինե Ղ.-ին հասցրել է ինքնասպանության փորձ կատարելուն. 2012 թ. հոկտեմբերի վերջին աղջիկը Վանաձոր քաղաքի «Սայաթ Նովայի» անվան այգում երակները կտրելու միջոցով կատարել է ինքնասպանության փորձ, իսկ 2012 թ. նոյեմբերի 5-ին Արփինե Ղ.-ն փորձել է ինքնասպան լինել՝ իրենց ցած նետելով շենքի 4-րդ հարկում գտնվող իրենց բնակարանի պատուհանից:

Մեղադրյալի նկատմամբ խափանման միջոց է ընտրվել հսկողության հանձնելը:

Իսկ համաձայն ՀՀ քրեական օրենսգրքի 110-րդ հոդվածի՝ սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը, պատժվում է ազատազրկմամբ՝ առավելագույնը երեք տարի ժամկետով: