Վազգեն Խաչիկյանի գործով դատը հետաձգվել է

ՀՀ աշխատանքի և սոցիալական հարցերի նախարարության սոցիալական ապահովության պետական ծառայության նախկին պետ Վազգեն Խաչիկյանի և 12 նախկին աշխատակիցների գործով ամբաստանյալ Հովհաննես Գրիգորյանի փաստաբան Արամ Զաքարյանը մարտի 19-ի նիստում միջնորդություն է ներկայացրել իր պաշտպանյալին գրավի դիմաց ազատելու պահանջով:

Դատարանը մարտի 5-ին՝ առաջին դատավարության ժամանակ, որոշում էր կայացրել, որ Վազգեն Խաչիկյանի և 12 նախկին աշխատակիցների գործով դատական նիստերը կանցկացվեն յուրաքանչյուր երեքշաբթի, սակայն տեխնիկական խնդիրների պատճառով դատական նիստերի անցկացման օրը տեղափոխվեց հինգշաբթի:

Վազգեն Խաչիկյանին մեղադրանք է առաջադրվել այն բանի համար, որ նա, 2005թ. հունվարի 14-ից մինչև 2010թ. դեկտեմբերի 17- ն աշխատելով ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի պաշտոնում, հանդիսանալով մշտապես կազմակերպչական-տնօրինչական և վարչատնտեսական գործառույթներ իրականացնող պաշտոնատար անձ և օգտվելով ծառայությունը կառավարելու իր լիազորություններից, մասնավորապես՝ այն, որ իր կողմից վերահսկվել է կենսաթոշակառուների կողմից կասեցված կենսաթոշակի վճարումը վերսկսելու վերաբերյալ կենսաթոշակային ապահովության և առանձին ծրագրերի վարչությանը ներկայացված դիմումների հիման վրա կուտակված կենսաթոշակների գումարները ծառայության վճարային ծառայության Երևան քաղաքի ստորաբաժանումների կողմից վճարելու գործընթացը՝ ծառայության մի շարք պաշտոնատար և պատասխանատու անձանց հետ, կազմակերպված խմբով, 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, պաշտոնեկան կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի, ընդհանուր՝ 260.956.681 ՀՀ դրամ գումարները բացի այդ՝ Վազգեն Խաչիկյանը խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի՝ 29.000.000 ՀՀ դրամ գումարը:

Վազգեն Խաչիկյանի շահերը պաշտպանում է Փաստաբանների պալատի փաստաբան Ժորա Վարոսյանը: Պաշտպաններից Լուսինե Սահակյանը բացակայում էր դատավարությունից: