Կառավարության ներկայացուցիչը չգիտի՝ ինքը լիազորվա՞ծ է, թե՞ ոչ

«Միլանո» խանութի նախկին սեփականատերերից մեկի՝ «Օլիմպ» արտադրական կոոպերատիվի հայցադիմումի գործով Երևանի Կենտրոն և Նորք-Մարաշ վարչական շրջանների դատարանում՝ դատավոր Գայանե Կարախանյանի նախագահությամբ, նշանակված այսօրվա դատական նիստը տեղի չունեցավ և հետաձգվեց մինչև ապրիլի 13-ը:

Նիստը հետաձգվեց պատասխանող կողմի ներկայացուցիչ, Երևանի քաղաքապետարանի աշխատակազմի իրավաբանական վարչության գլխավոր մասնագետ Հրանուշ Ներսիսյանի հայտարարության պատճառով՝ ըստ կողմի ներկայացուցչի, հայցի փոփոխություն է տեղի ունեցել, և ինքը տեղյակ չէ, թե կառավարությունը քաղաքապետարանին լիազորելու է շարունակել ներկայացնել իր շահերը, թե ոչ: Հայցվորի ներկայացուցիչ, փաստաբան Հայկ Ալումյանը «Փաստինֆո»-ի թղթակցի հետ զրույցում ասաց, որ դա բնավ հայցի փոփոխություն չէ, իրենք սոսկ ներկայացրել են գույքի օտարման պայմանագրի նախագիծ՝ այն վավեր ճանաչելու պահանջով: Փոփոխությամբ կողմը պահանջում է օտարման պայմանագրում, ներառել երեք հարկերն ու նկուղը՝ մեկ հարկի օտարման նախկին պայմանագրի փոխարեն: Ըստ հայցվոր կողմի՝ պատասխանող կողմը բավարար՝ 15-օր, ժամանակ ուներ՝ կողմնորոշվելու լիազորությունների հարցում:

«Փաստինֆոն» հիշեցնում է, որ ըստ հայցադիմումի, հայցվորը պահանջում է պատասխանողներից՝ Հայաստանի Հանրապետությունից և «Ավո Ֆ. Մ. Հ.» ՍՊ ընկերությունից հանուն պետական կարիքների օտարված գույքի դիմաց ողջ փոխհատուցումը: Ցայժմ, ըստ կողմի, փոխհատուցվել է 5-8 մլն դոլար արժողությամբ գույքի 1/10-րդ մասից էլ ավելի քիչ: Ըստ հայցվոր կողմի, փոխհատուցման պայմանագրում հաշվի չեն առնվել շինության 2-րդ, 3-րդ, նկուղային հարկերը և հողատարածքը: