Մարդաշատ վայրում կրակել էր իր հետ վիճած երիտասարդի ուղղությամբ. վերջինս մահացել էր

ՀՀ կառավարությանն առընթեր ոստիկանության քննչական գլխավոր վարչությունում ավարտվել է Գ. Պոլեյանի կողմից սպանություն կատարելու եւ ապօրինի կերպով զենք կրելու դեպքի առթիվ քննվող քրեական գործի նախաքննությունը: Քրեական գործով դատավարական ղեկավարում իրականացնող ՀՀ գլխավոր դատախազության մարդու դեմ ուղղված հանցագործությունների գործերով վարչության դատախազը հաստատել է մեղադրական եզրակացությունը:

Նախաքննությամբ պարզվել է, որ 2008թ. մարտի 4-ին՝ ժամը 17:00-ի սահմաններում, Գ. Պոլեյանը եւ Ս. Զորոյանը Երեւան քաղաքի երկաթուղային կայարանի հրապարակում մի խումբ անձանց հետ վիճաբանել են: Անավարտ թողնված վիճաբանության շուրջ պարզաբանումներ պահանջելու նպատակով նույն օրը՝ ժամը 18:00-ի սահմաններում, Գ. Պոլեյանը հանդիպել է Ա. Գալստյանի եւ նրա ընկերների հետ: Վերսկսված վիճաբանության ընթացքում Գ. Պոլեյանը վրդովվել է Ա. Գալստյանի կողմից հնչեցված սպառնալիքներից:

Մինչդատական վարույթում ձեռք բերված փաստական տվյալների համաձայն՝ Ա. Գալստյանին ապօրինաբար կյանքից զրկելու դիտավորությամբ, իրական վտանգի տակ դնելով ինչպես Ա. Գալստյանի, վերջինիս ընկերներ Ա. Բադալյանի եւ Հ. Քլյանի, այնպես էլ մյուս ներկաների կյանքը՝ Գ. Պոլեյանն իր կողմից ապօրինի կրվող ատրճանակից մարդաշատ վայրում կրակոցներ է արձակել Ա. Գալստյանի ուղղությամբ, ով ծոծրակի շրջանում ստացած հրազենային վնասվածքից մահացել է:

Ձեռք բերված ապացույցների հիման վրա Գ. Պոլեյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 6-րդ կետով եւ 235-րդ հոդվածի 1-ին մասով:

Քրեական գործը մեղադրական եզրակացությամբ ուղարկվել է Երեւան քաղաքի Էրեբունի եւ Նուբարաշեն վարչական շրջանների ընդհանուր իրավասության առաջին ատյանի դատարան:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով: