Հայազգի Վան Գոգը. Արևմտյան ԶԼՄ-ները՝ Արթուր Փինաջյանի մասին

Մայիսի 1-ին ԱՄՆ-ի Կալիֆորնիա նահանգի Հայ առաքելական եկեղեցու թեմի Զորայան թանգարանում տեղի կունենա ծագումով հայ ամերիկաբնակ նկարիչ Արթուր Փինաջյանի արվեստի գործերի ցուցահանդես-վաճառքը: Ամերիկյան La Cañada Valley Sun պարբերականն անդրադարձ է կատարել այդ մշակութային իրադարձությանը՝ համեմատելով Փինաջյանին աշխարհահռչակ նկարիչ Վան Գոգի հետ. գրում է Novostink-ը:

Փինաջյանն աշխատում էր Նյու Յորքի Բելփոսթ գյուղում իր փոքրիկ բնակարանում, որը պատկանում էր նրա քրոջը: Հենց այդտես էլ նա ապրել է ընդհուպ մինչև իր մահը՝ 1999-ը:

Հոդվածը նշում է, որ Փինաջյանը ստեղծում էր և պահպանում իր արվեստի գործերը:

Հոդվածի հեղինակ Սառա Կարդինը համեմատում է Փինաջյանին իմպրեսիոնիզմի աշխարհառչակ խոշորագույն նկարիչ Վինսենտ Վան Գոգի հետ, որի արվեստը ժամանակին նույնպես չգնահատեցին ըստ արժանվույն: Նրա աշխատանքներն աշխարհին հայտնի դարձան միայն նրա մահից տասնամյակներ անց:

«Ինչպես և Վան Գոգը,- գրում է հեղինակը, հայազգի ամերիկյան նկարիչը, ով նկարչի իր կարիերան սկսել է որպես ծաղրանկարիչ, կյանքի օրոք շատ քիչ է ուշադրության արժանացել, գումար չի վաստակել իր արվեստով: Միայն երբ 2006-ին բիզնես-գործընկերներ Թոմաս Շուլցն ու Լորենս Ջոզեֆը որպես անշարժ գույք գնեցին նկարչի տունը, այնտեղ հայտնաբերեցին հազարավոր նկարներ և էսքիզներ: Ահա այդ միջոցով աշխարհը հաղորդակից դարձավ նրա տաղանդին»,-նշում է նա:

Իր ողջ կյանքում Փինաջյանն ապրել է այդ տանը իր քրոջ հետ: Կյանքի օրոք նկարիչը կնոջն իր կտակում հանձնարարել էր մահից հետո այրել իր նկարները, սակայն քույրը թույլ չէր տվել: Քրոջ մահից հետո 2005-ին նկարչի հարազատները որոշել էին վաճառել բնակարանը: Երջանիկ գնորդները, ովքեր դրա դիմաց վճարել էին 300 հազար դոլար, տան ձեղնահարկում և ավտոտնակում հայտնաբերել էին միլիոնավոր դոլարներ նկարչի ավելի քան 3000 աշխատանքների տեսքով:

«Ավտոտնակի հատակը լրիվ կորած էր փոշու մեջ, իսկ ողջ ավտոտնակը լի էր նկարներով»,-հիշում է տունը գնած Շուլցը:

Այսօր Փինաջյանի կտավներով հիանում են միլիոնավոր մարդիկ: Արվեստի գործերը ցուցադրվել են ԱՄՆ-ի ամենատարբեր ցուցահանդեսներում, ուր դրանց արժեքը տատանվում է մի քանի հազար դոլարից մինչև մի քանի հարյուր դոլարի սահմաններում: Որոշ աշխատանքներ գնահատվել են 500 հազար դոլար:

Նրա աշխատանքներն ընդհանուր առմամբ գնահատվել են 30 մլն դոլար: