Բրիտանացիները կապ են գտել կնոջ կոշիկի կրունկների բարձրության և տնտեսական աճի միջև

Բրիտանացի փորձագետները ուղիղ կապ են գտել կանացի կոշիկների կրունկների բարձրության և տնտեսական աճի միջև:

«Մենք դա անվանում ենք տատանման ինդեքս»,-ասում է բրիտանական ինտերնետ-խանութներից մեկի՝ Very.co.uk-ի ներկայացուցիչ Ջուլի Դոնելին:

Նա պնդում է, որ ուժեղ տնտեսական աճի պայմաններում մեծանում է նաև գերբարձրակրունկ կոշիկների պահանջարկը. հայտնում է The Daily Mail-ը:

«Բարձրակրունկ կոշիկները խոսում են կյանքի նկատմամբ անհոգ վերաբերմունքի մասին: Երբ վրա են հասնում դժվարին ժամանակներ, կրունկի բարձրությունը նվազում է, քանի որ մենք փորձում ենք կայունության ձգտել»,-ասում է Դոնելին:

Նրա խոսքերով՝ Մեծ Բրիտանիայում վերջին ժամանակներս հատկապես պահանջարկ են վայելում տափակ կոշիկները: Մեկ տարվա ընթացքում դրանց վաճառքն ավելացել է 25%-ով:

Սակայն գնորդները նախընտրությունը տալիս են վառ գույներին, ինչը վկայում է, որ մարդիկ լավատեսորեն են տրամադրված երկրի տնտեսության հեռանկարների հանդեպ:

The Washington Times-ը դեռևս 2009-ին գրել էր, որ համաշխարհային տնտեսական ճգնաժամը հարկադրել էր կանանց հրաժարվել սեքսուալ ներքնազգեստներից և անցնել ավելի պրակտիկ ու հասարակ ներքնաշորի: