Ստել է՝ թե սեռական հարաբերությունն իր կամքով չի եղել

Լոռու մարզի ընդհանուր իրավասության դատարանը քննության է առել Ալիսա Մ.-ի նկատմամբ քրեական գործը:

Վերջինին մեղադրանք է առաջադրվել այն բանի համար, որ նա 2012թ. դեկտեմբերի 23-ին՝ ժամը 22։30-ի սահմաններում, իր կամքով սեռական հարաբերություն է ունեցել Լոռու մարզի Կրուգլայա-Շիշկա գյուղի բնակիչ Ա. Ավագյանի հետ, սակայն մտավախություն ունենալով, որ նշված հարաբերության մասին կարող են տեղեկանալ համագյուղացիները, հետագա ասեկոսեներից խուսափելու համար 2012թ. դեկտեմբերի 24-ին՝ ժամը 07։00-ին, ոստիկանութան Տաշիրի բաժնում հաղորդում է տվել Ա. Ավագյանի կողմից դանակի գործադրման սպառնալիքով իր կամքին հակառակ սեռական հարաբերություն ունենալու՝ իրեն բռնաբարելու վերաբերյալ՝ կատարելով սուտ մատնություն, որը զուգորդվել է ծանր հանցագործության մեջ մեղադրելով։ Այս մասին գրել է iravaban.net-ը։

Համաձայն ՀՀ քրեական օրենսգրքի 333-րդ հոդվածի՝ հանցագործության մասին սուտ մատնությունը, եթե անձը գործել է գիտակցելով, որ իր տրամադրած տեղեկատվությունը կեղծ է և նույն արարքը, որը զուգորդվել է ծանր կամ առանձնապես ծանր հանցագործության մեջ մեղադրելով, պատժվում է ազատազրկմամբ՝ առավելագույնը հինգ տարի ժամկետով: