Պոռնկությամբ զբաղվելը 1000 դրամ միջնորդավճար է պահանջում

Վերաքննիչ քրեական դատարանում Գրիշա Մելիք-Սարգսյանի նախագահությամբ, դատավորներ Կարինե Ղազարյանի և Հենրիկ Տեր-Ադամյանի մասնակցությամբ ավարտվեց ամբաստանյալ Անահիտ Սարգսյանի բերած վերաքննիչ բողոքի քննությունը:

Ըստ մեղադրանքի՝ 2010 թվականից մինչև 2012 թվականի օգոստոսի 25-ը, որպես ադմինիստրատոր աշխատելով Գյումրիի «Լիբերտա» հյուրանոցային համալիրում, Սարգսյանը մի քանի մարմնավաճառների պարբերաբար հյուրանոց է հրավիրել և սենյակներ տրամադրել:

Նա նպաստել է այդ մարմնավաճառների կողմից պոռնկությամբ զբաղվելուն և յուրաքանչյուր հաճախորդի համար հազարական դրամ միջնորդավճար է ստացել: Այս մասին գրել է 1in.am-ը։

Շիրակի մարզի ընդհանուր իրավասության դատարանը Հարություն Մովսեսյանի նախագահությամբ 2012 թվականի դեկտեմբերի 26-ի դատավճռով «Ղազարյանների Լիբերտա» ՍՊԸ-ին պատկանող «Լիբերտա» հյուրանոցի ադմինիստրատոր, 44-ամյա Անահիտ Սարգսյանին մեղավոր է ճանաչել ՀՀ քրեական օրենսգրքի 262 հոդվածի 2-րդ մասի 5-րդ կետով և դատապարտել 3 տարի ազատազրկման՝ զրկելով սպասարկման ու ծառայություններ մատուցելու ոլորտում ղեկավար պաշտոններ զբաղեցնելու իրավունքից 2 տարի ժամկետով:

Այս մարզում, երևում է, բավական խստահայաց են պոռնկությամբ զբաղվողների համար նպաստավոր պայմաններ ապահովողների նկատմամբ: Սակայն

Անահիտ Սարգսյանին տեսնողը չէր ասի, թե միամիտ այդ կինը հավակնություն կարող էր ունենալ ներկայումս կամ էլ երեք տարի ազատազրկում կրելուց հետո որևէ «ղեկավար պաշտոն» զբաղեցնել, այն էլ՝ սպասարկման ու ծառայություններ մատուցելու ոլորտում: Հավաքարարի աշխատանքն էլ իր համար բարեբախտություն էր համարում և զարմանում, որ հյուրանոցի տիրոջը ծառայելու համար իրեն դատել էին, քիչ է, դեռ երեք տարի էլ ազատազրկում էին նշանակել:

Շիրակի մարզի ընդհանուր իրավասության դատարանի դատավճռի դեմ վերաքննիչ բողոք էր բերել հենց պարզամիտ ամբաստանյալը՝ խնդրելով պայմանական դատապարտություն կիրառել իր նկատմամբ, չազատազրկել:

Վերաքննիչ դատարանում իր բողոքի հիմնավորման ժամանակ Անահիտ Սարգսյանը հռետորական հարց հնչեցրեց. «Ես ո՞վ եմ, որ առանց հյուրանոցի տիրոջ թույլտվության մարմնավաճառի կանչեի: Ինձ ասում էին՝ զանգի, ես էլ զանգում էի: Ես շատ եմ զղջում, վատ բան եմ արել ու ինձ մեղավոր եմ ճանաչում»:

Առանց պաշտպանի, ինքնուրույն իր պաշտպանությունը ստանձնած, իրավական ոլորտից ոչինչ չհասկացող Անահիտը ժողովրդական լեզվով ներկայացրեց, որ վատառողջ է. «Աջ ձեռքս, ամբողջ աջ կողմս չի աշխատում... Կարող եմ ձեռքս ցույց տալ»:

Դատավորի հումորային հարցին, թե ո՞ր ձեռքով է ամբաստանյալը զանգել մարմնավաճառներին, նա պատրաստակամորեն պատասխանեց՝ ձախ ձեռքով: Ամուսինը մահացել էր երկրաշարժի օրը՝ դեկտեմբերի 7-ին: Երկու երեխայի հոգսը մնացել էր Անահիտի ուսերին: Մի երեխային ամուսնացրել էր, իսկ մյուսը հիվանդ է՝ վատ տեսողություն ունի, անկարող է աշխատել:

Անահիտ Սարգսյանն իր վատառողջությունը հաստատող բժշկական թղթեր էր ներկայացրել ընդհանուր իրավասության դատարան: Հին բժշկական թղթերը վկայում էին, որ այս կինը լուրջ հիվանդություններ ուներ, սակայն ներկա պահին նրա առողջական վիճակի վերաբերյալ փաստաթուղթ չկար:

Վերաքննիչ դատարանը որոշեց ժամանակ տալ դեռևս ազատության մեջ գտնվող ամբաստանյալին, որ նա մեկ անգամ ևս բժշկական հետազոտություն անցնի ու տեղեկանք ներկայացնի իր ներկա առողջական վիճակի վերաբերյալ:

Դատարանը ստիպված եղավ երկու անգամ հետաձգել նիստը, որովհետև Անահիտ Սարգսյանը խուսափում էր հետազոտվելուց, ասում էր, թե դրա համար գումար պիտի ծախսի, սակայն փող չունի:

Վերջապես այսօր նա վերաքննիչ դատարան ներկայացրեց օրերս անցկացված բժշկական հետազոտության վերաբերյալ տեղեկանք, որտեղ նշված էր ախտորոշումը: Իմ հարցին ի պատասխան՝ Անահիտ Սարգսյանն ասաց. «Հա, ստուգվեցի: Դե, հիվանդ եմ, ճառագայթ պիտի ստանամ: Չգիտեմ էլ, թե ինչքան կապրեմ»,- ու սկսեց արտասվել:

Մինչ ամբաստանյալն արտասվում էր, դատավորները խորհրդակցում էին խորհրդակցական սենյակում: Ապա դուրս եկան ու հրապարակեցին որոշումը. ամբաստանյալի վերաքննիչ բողոքը բավարարվեց. նրա նկատմամբ կիրառվեց պայմանական դատապարտություն, սահմանվեց 3 տարի փորձաշրջան:

«Հասկացա՞ք»,- հրապարակումից հետո հարցրեց նախագահողը: «Չէ»,- անհամարձակ պատասխանեց ամբաստանյալը:

Եվ դատավորը բացատրեց, որ նրան երեք տարով չեն ազատազրկի, ճիշտ է, բայց երեք տարի նա պարտավոր է լինելու օրենքը չխախտել, հակառակ դեպքում նոր արարքի համար նշանակվելիք պատժին կգումարվի այս դատավճռով սահմանված երեք տարի ազատազրկումը:

«Ուզում եմ իմ խորին շնորհակալությունը հայտնել ձեզ, հարգելի դատարան: Խոստանում եմ, որ էլ երբեք նախկին գործը չեմ անի, գիտեմ, որ վատ բան եմ արել, էլ չեմ անի, խոստանում եմ...»,- Անահիտ Սարգսյանը աշակերտի նման խոստումներ էր տալիս:

«Հնարավոր է, որ դատախազը բողոքարկի, մեր որոշումը ուժի մեջ կմտնի մեկ ամիս անց»,- պաշտպան չունեցող կնոջ ոգևորությունը փորձեց իրականությանը համապատասխանեցնել դատավորը:

«Չէ, չի բողոքարկի, ինչո՞ւ պիտի բողոքի»,- համոզված զարմացավ միամիտ կինը և բարձր տրամադրությամբ մեկնեց Գյումրի: Դեռ «ճառագայթ էլ պիտի ստանար»: