Հետխորհրդային երկրներից ամենաշատը մարդիկ ուզում են արտագաղթել Հայաստանից. Gallup

Gallup World ընկերության կողմից անցկացված հարցումների համաձայն՝ հետխորհրդային երկրներից ամենաշատը Հայաստանում են մարդիկ ցանկանում լքել հայրենիքը: Հայաստանից արտագաղթել ցանկացողների թիվը 40% է կազմում: Իսկ իրենց երկրում ապրելու և աշխատելու ցանկություն ամենաշատը ունեն ուզբեկները: Ուզբեկստանում հարցվածների միայն 5 %-ն է պատասխանել, թե հնարավորության դեպքում կլքեր իր երկիրը:

Հարցումն անցկացվել է նախկին խորհրդային պետություններում 2010-2012թթ. ընթացքում: Մասնակիցներին հարց են տվել, թե հնարավորության դեպքում կցանկանային արդյոք նրանք մեկնել իրենց երկրից, թե կգերադասեին ապրել հայրենիքում:

Վիճակագրական աղյուսակը հետևյալ տեսքն ունի:

Այսպիսով՝ Հայաստանից ցանկանում է հեռանալ բնակչության 40%-ը, Մոլդովայից՝ 32, Ուկրաինայից՝ 21, Բելառուսից՝ 17, Ղրղզստանից՝ 16, Ռուսաստանից՝ 14, Ադրբեջանից՝ 14, Վրաստանից՝ 14, Ղազախստանից՝ 13, Տաջիկստանից՝ 11, Թուրքմենստանից՝ 6 և Ուզբեկստանից՝ 5%-ը:

Արտագաղթի հիմնական գործոնների թվում մարդիկ նշել են սոցիալ-տնտեսական ծանր պայմանները: Հարցվածների 52%-ը ցանկանում է արտագաղթել, որպեսզի ավելի բարեկեցիկ կյանքով ապրի, 13%-ը մտածում է իր երեխաների ապագայի մասին, իսկ 10%-ի դեպքում էլ մարդիկ արտագաղթում են աշխատանք գտնելու համար: