Վրաստանի վարչապետ Իվանիշվիլիի անունը հայտնվել է օֆշորային ընկերություններ ունեցող անձանց ցուցակում. Guardian

Բրիտանական Guardian պարբերականն իր հոդվածներից մեկում տպագրել է բրիտանական Վիջինյան կղզիներում օֆշորային գաղտնի ընկերություններ ունեցող մարդկանց անունները: Դրանց ցուցակում է հայտնվել նաև Վրաստանի վարչապետ Բիձինա Իվանիշվիլին: Այդ ցուցակում են նաև ակնառու գործիչներ Պակիստանից, Հնդկաստանից, Թաիլանդից և Ինդոնեզիայից:

Ըստ Guardian-ի՝ Իվանիշվիլիին է պատկանել օֆշորային Bosherston Overseas Corp ընկերությունը, որը նրան է պատկանել 2006-2009թթ.։ Պարբերականը նշում է, որ ամբողջ աշխարհում օֆշորային հաշվեհամարներին առկա միջոցները գերազանցում են 20 տրլն դոլարը:

Վրաստանի կառավարությունը մամլո հաղորդագրություն է տարածել երկրի վարչապետ Բիձինա Իվանիշվիլիի ֆինանսական ունեցվածքի հետ կապված. գրում է Грузия-Online-ը:

«Վրաստանի կառավարությունը տեղյակ է եղել Բիձինա Իվանիշվիլիի և Բրիտանիայի Վիջինյան կղզիներում գտնվող ընկերություններից մեկի միջև անցյալում գոյություն ունեցած գործնական կապի մասին:

Համաձայն Վրաստանի օրենսդրության՝ վարչապետը պարտավոր է հայտնել իր բոլոր ակտիվների մասին, որոնք գտնվում են նրա տնօրինության տակ: Իվանիշվիլին մեկ անգամ չէ հայտարարել, որ առավելագույն թափանցիկության հասնելու նպատակով պահպանելու է օրենքի բոլոր պահանջները և հանրությանը հասանելի է դարձնելու սեփական ֆինանսներին վերաբերող տեղեկությունները:

2011-2012թթ. հաշվետու ժամանակահատվածում Իվանիշվիլին՝ որպես վարչապետի թեկնածու, իսկ դրանից հետո արդեն՝ որպես վարչապետ, բաժնեմասեր չի ունեցել վերոնշյալ ընկերությունում: Ուստի՝ ելնելով դրանից՝ կարիք չի եղել այդ մասին բարձրաձայնել հաշվետու հռչակագրում»,-ասված է հայտարարության մեջ: