Գողություն է կատարել հենց ընկերուհու տանից

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի վարույթում էր գտնվում քրեական գործն ըստ մեղադրանքի Էլյանորա Բ.-ի:

Էլյանորա Բ.-ին մեղադրանք է առաջադրվել այն բանի համար, որ նա 2012թ. սեպտեմբերի 11-ին հյուրընկալված լինելով ընկերուհու բնակարանում, ննջասենյակում գտնվող զարդատուփից գաղտնի հափշտակել է ոսկյա մատանի, այսինքն կատարել է քրեական օրենքով արգելված արարք:

Համաձայն ՀՀ քրեական օրեսնգրքի 177-րդ հոդվածի 1-ին մասի՝ գողությունը՝ ուրիշի գույքի զգալի չափերով գաղտնի հափշտակությունը՝ պատժվում է տուգանքով՝ նվազագույն աշխատավարձի հարյուրապատիկից չորսհարյուրապատիկի չափով, կամ կալանքով՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:

Գործով մեղադրյալի նկատմամբ որպես խափանման միջոց ընտրվել էր ստորագրություն չհեռանալու մասին:

Դատարանում մեղադրանքը պաշտպանվում էր Կենտրոն և Նորք-Մարաշ վարչական շրջանների դատախազության կողմից:

2013թ. փետրվարի 11-ին նույն դատարանում` դռնբաց դատական նիստում, արագացված դատական քննության կարգով քննեց քրեական գործն ըստ մեղադրանքի`

Էլյանոռա Բ.-ի և վճռեց նրան ճանաչել մեղավոր ՀՀ քրեական օրենսգրքի 177-րդ հոդվածի 1-ին մասով, ՀՀ քրեական օրենսգքրի 177-րդ հոդվածի 2-րդ մասի 2-րդ կետով և ՀՀ քրեական օրենսգրքի 177-րդ հոդվածի 1-ին մասով նախատեսված հանցագործությունների կատարման մեջ, նրա նկատմամբ նշանակել պատիժ' ՀՀ քրեական օրենսգրքի 177-րդ հոդվածի 1-ին մասով` տուգանք 150.000 (հարյուր հիսուն հազար) ՀՀ դրամի չափով, ՀՀ քրեական օրենսգրքի 177-րդ հոդվածի 2-րդ մասի 2-րդ կետով` տուգանք 500.000 (հինգ հարյուր հազար) ՀՀ դրամի չափով, ՀՀ քրեական օրենսգրքի 177-րդ հոդվածի 1-ին մասով` տուգանք 150.000 (հարյուր հիսուն հազար) ՀՀ դրամի չափով։

Կիրառելով ՀՀ քրեական օրենսգրքի 66-րդ հոդվածի 3-րդ մասը, նշանակված պատիժները մասնակիորեն գումարելով` Էլյանոռա Բ.-ի նկատմամբ վերջնական պատիժ նշանակել տուգանք 600.000 (վեց հարյուր հազար) ՀՀ դրամի չափով։ Էլյանոռա Բ.-ի նկատմամբ որպես խափանման միջոց ընտրված չհեռանալու մասին ստորագրությունը վերացնել' սույն դատավճիռն օրինական ուժի մեջ մտնելուց հետո։ Տուժող Նունե Հ–ի ներկայացրած քաղաքացիական հայցը բավարարել ամբողջությամբ' 1.000.000 (մեկ միլիոն) ՀՀ դրամի չափով, այն, որպես հանցագործությամբ պատճառված գույքային վնաս, բռնագանձել Էլյանոռա Բ.-ից։

Էլյանոռա Բ.-ի անշարժ և շարժական գույքերի նկատմամբ 1.000.000 (մեկ միլիոն) ՀՀ դրամի չափով կիրառել արգելանք' տուժող Նունե Հ.-ի ներկայացրած քաղաքացիական հայցի լրիվ բռնագանձումն ապահովելու նպատակով։

Իրեղեն ապացույց ճանաչված և սեփականատիրոջը` տուժող Նունե Հ.-ին ի պահ հանձնված բնական ալմաստը, երկու ադամանդները, մեկական ապակին և ապակու բեկորը` թողնել վերջինիս տնօրինությանը` դատավճիռն օրինական ուժի մեջ մտնելուց հետո։

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով' դատարանի' օրինական ուժի մեջ մտած դատավճռով:

Աղբյուրը' Իրավաբան.net