Նոր մանրամասներ Պռոշյանի գյուղապետ Հրաչ Մուրադյանի սպանության գործից

Ապրիլի 2-ին Կոտայքի մարզի Պռոշյան գյուղում կատարված՝ նույն գյուղի գյուղապետ Հրաչ Մուրադյանի սպանության փաստով հարուցված քրեական գործի նախաքննության ընթացքում Արայիկ Պետրոսյանից առգրավված՝ դեպքի օրը նրա հագին եղած հագուստի՝ սպորտային վերնազգեստի աջ և ձախ թևքերի վրա նույնպես դատաքիմիական փորձաքննությամբ հայտնաբերվել են կրակոցի արգասիքներ հանդիսացող անտիմոնի մետաղացման հետքեր: Այս մասին հայտնում են ՀՀ ոստիկանությունից։

Հիշեցնենք, որ ապրիլի 10-ին ոստիկանությունը հաղորդագրություն էր տարածել, որ Արայիկ Պետրոսյանի դեմքից և քթից, ինչպես նաև նրա կողմից դեպքի օրը շահագործված «ՎԱԶ-2121» մակնիշի ավտոմեքենայի սրահից՝ առջևի աջ կողմի մեջտեղի հենակի ներսի կողմից, առջևի ձախ դռան շրջանակից և պաստառի ներսի կողմից, համեմատական հետազոտության նպատակով խծուծների վրա վերցված նմուշներում դատաքիմիական փորձաքննությամբ եւս հայտնաբերվել են կրակոցի արգասիքներ հանդիսացող անտիմոնի մետաղացման հետքեր:

Մինչդեռ, նրա հայրը՝ Արշալույս Պետրոսյանը նախօրեին տարածել էր բաց նամակ՝ մտահոգություն հայտնելով քննության ընթացքի կապակցությամբ։ Անդրադառնալով քննությամբ ձեռք բերված ապացույցներին՝ Ա.Պետրոսյանը նշել էր. «Օբյեկտիվորեն չունենալով սպանության հանգամանքների հետ որևէ աղերս ունեցող փաստ, նախաքննության մարմինը հղում է կատարում որդուս դեմքին և նրա կողմից այդ օրը վարած ավտոմեքենայի սրահում հայտնաբերված «անտիմոն» տեսակի նյութին, որն իբրև թե հանդիսանում է կրակոցի արգասիք: Այդ կապակցությամբ որդիս տվել է համապատասխան բացատրություն, որ այդ օրը առնչվել է ավտոմեքենայի մարտկոցի հետ, որի մեջ, ըստ մասնագետների, նույնպես կա «անտիմոն» տեսակի նյութ: Այդուհանդերձ, իմ խորին համոզմամբ, որդիներս որևէ շարժառիթ չունեին կատարելու նման հանցագործություն, ավելին՝ լուսահոգի Հ. Մուրադյանի հետ ունեցել են նորմալ, մարդկային հարաբերություններ»:

Մեղադրյալի հայրը կարծիք էր հայտնել, թե «փորձ է արվում արհեստականորեն ստեղծել տրամադրություն կամ համոզմունք, թե իբր որդիներիս և լուսահոգի Հ. Մուրադյանի միջև եղել է հակամարտություն և անհաշտ հարաբերություններ: Ավելին՝ այս ամենի նպատակն է հնարավոր բոլոր միջոցներով գտնել «հետքեր», որոնք «կհիմնավորեն» որդիներիս առնչությունը Հ. Մուրադյանի սպանության հետ»:

Ոստիկանության քննչական գլխավոր վարչության հատկապես կարեւոր գործերով քննության վարչությունում քրեական գործի նախաքննությունը շարունակվում է:

«Փաստինֆո»