Դատավորը 10 րոպեում կայացրեց Ստեփան Հովակիմյանի դատավճիռը

Կենտրոն և Նորք Մարաշ համայնքների ընդհանուր իրավասության դատարանի դատավոր Արշակ Վարդանյանը 10 րոպեում կայացրեց Ստեփան Հովակիմյանի դատավճիռը: Դեռևս 2010 թվականի փետրվարին «Մոսկվա Կինոթատրոնի գողության» գործով ձեռբակալված Հովակիմյանին մեղադրանք էր առաջադրվել այն բանի համար, որ 2012 թվականի հուլիսի 26-ին Երևանի Կենտրոն և Նորք Մարաշ վարչական շրջանների ընդհանուր իրավասության դատարանի թիվ 1 նիստերի դահլիճում ընթացող վերոնշյալ գործի դատաքննության ժամանակ մասնակցելով որպես ամբաստանյալ, խափանելով դատաքննության նորմալ ընթացքը՝ իր մոտ եղած ածելիով վնասել է ձախ ձեռքի նախաբազուկը, ապա վերցնելով սեղանին դրված բարձրախոսը՝ իշխանության ներկայացուցիչ հանդիսացող մեղադրող դատախազ Սամվել Հարությունյանին հարվածելու դիտավորությամբ այն փորձել է նետել նրա ուղղությամբ, ինչը կանխվել է ծառայությունն իրականացնող ոստիկանների և դատական կարգադրիչների կողմից: Այնուհետև, մոտենալով Սամվել Հարությունյանին՝ նրա կյանքի և առողջության համար ոչ վտանգավոր բռնություն գործադրելով՝ ոտքով հարվածել է վերջինիս կոնքին:

Մեղադրող դատախազ Ջոն Ֆարխոյանը մեղադրական ճառում նշեց, որ դատարան հրավիրված վկաների ցուցմունքների, դեպքի վայրի զննության և Ստեփանի դատաբժշկական փորձաքննության արդյուքներով դեպքը ապացուցված է, որի համար միջնորդեց Հովակիմյանին դատապարտել 1 տարի 6 ամիս ազատազրկման և դրան գումարել Մոսկվա կինոթատրոնի գործով կայացված 3 տարվա դատավճիռը, այսինքն՝ ընդհանուր 4.5 տարի:

Այսօրվա դատական նիստի ժամանակ Հովակիմյանի պաշտպան նշանակված Արշակ Կարապետյանը պաշտպանական ճառում նշեց, որ Ստեփանը ինքնավնասումն իրականացրել է դատավարությունը հետաձգելու նպատակով, որի արդյունքում արժանացել է դահլիճում գտնվող ոստիկանների ու դատական կարգադրիչների կոպիտ վերաբերմունքին, ովքեր անմիջապես ինքնավնասումից հետո փորձել են նրան դուրս բերել դատական նիստերի դահլիճից: Ըստ Կարապետյանի՝ Ստեփանն անգամ ցանկության դեպքում չէր կարող հարվածել Սամվել Հարությունյանին, քանի որ շրջապատված է եղել ոստիկաններով, նրա ոտքն ուղղակի դիպչել է Հարությունյանին:

Պաշտպանը նաև նշեց, որ դեպքի օրը Ստեփանը հոգեկան անհավասարակշիռ վիճակում է գտնվել և անհիմն համարեց այն, որ դատարանը մերժել է Ստեփանի հոգեբանական վիճակի վերաբերյալ փորձաքննության անցկացնելու պաշտպանական կողմի միջնորդությունը:

Կարապետյանը խնդրեց դատավորին արդարացնել Հովակիմյանին, սակայն միևնույն ժամանակ նաև նշեց, որ եթե, այնուամենայնիվ, վերջինս որոշի պատժել նրան, ապա դա կլինի ազատազրկման հետ կապ չունեցող պատիժ:

Դատավոր Արշակ Վարդանյանը որոշում կայացրեց Հովակիմյանին ազատազրկել մեկ տարի ժամկետով, որին մասնակիորեն գումարեց Մոսկվա կինոթատրոնի գողության գործով սահմանցած 3 տարի պատիժը՝ ընդհանուր սահմանելով 3 տարի 9 ամիս ժամկետով ազատազրկում: Պատժի սկիզբը հաշվվում է 2010 թվականի փետրվարի 6-ից:

Lurer com-ը զրուցեց նաեւ Ստեփանի հոր՝ Բենիամին Հովակիմյանի հետ, որ ցնցված էր կայացված դատավճռից ու ասաց, որ անգամ չգիտի՝ բողոքարկի այն, թե ևս 6 ամիս համբերի, մինչ որդու պատժի կրման ժամկետը կլրանա:

Արաքս Մամուլյան