ԱՄՆ-ի հատուկ ծառայությունները պարզել են Ցարնաևին ահաբեկչության դրդած ենթադրաբար հայ Միշայի անձը

ԱՄՆ-ի հատուկ ծառայություններին հաջողվել է պարզել Բոսթոնի ահաբեկիչներից ավագի` Տամերլան Ցարնաևի մոտ ընկեր հանդիսացող առեղծվածային Միքայելի անձը, ով Ցարնաևի հարազատների խոսքերով` մեծ ազդեցություն է ունեցել իրենց տղայի վրա և նպաստել, որ վերջինս սկսի հարել արմատական իսլամի հայացքներին. տեղեկացնում է CNN-ը՝ հղում կատարելով իր աղբյուրներին:

Ավելի վաղ ԶԼՄ-ները, հղում կատարելով Ցարնաևի հարազատներին, հայտնել էին, թե Տամերլան ավագի վրա մեծ ազդեցություն է թողել հայ ծագմամբ ոմն Միշան, ով իսլամ էր քարոզում Տամերլան Ցարնաևի համար: Ցարնաև ընտանիքի անդամները պնդում են, թե հենց նրա հետ շփումն է դրդել Տամերլանին հրաժարվել երաժշտության և սպորտի պարապմունքներից և տարվել արմատական իսլամով:

Այս կապակցությամբ իրենց արձագանքն է տվել նաև Բոսթոնում ԱՄՆ-ի հայ համայնքը:

Հայ համայնքի անդամները ցնցված են այդ լուրերից և կասկածի տակ են առնում Բոսթոնի ահաբեկչի հայկական արմատները. գրում է Washington Post-ը:

«Հայ ազգին պատկանող մարդու համար իսլամ ընդունելը հավասար է բաց դաշտում ռնգեղջյուր փնտրելուն»,-հայտարարել է Քեմբրիջում բնակվող ինֆորմացիոն տեխնոլոգիաների ընկերության տնօրեն 32-ամյա Ներսես Զուրաբյանը: Իսլամ ընդունած հայ մարդն այնպիսի արտառոց դեպք կլիներ այստեղ, որ նրան կճանաչեր ԱՄՆ-ի ողջ հայ համայնքը. մեջբերում է պարբերականը նրա խոսքերը: