Քավոր Հարութի անչափահաս որդուն կալանավորեցին ու ուղարկեցին Աբովյան

Հենց նոր Շիրակի մարզի ընդհանուր իրավասության դատարանը որոշեց նախնական երկու ամիս ժամկետով կալանքի տակ պահել Գյումրու կրակոցների գործով ձերբակալված քավոր Հարութի անչափահաս որդուն`Գևոր Խաչատրյանին: Նա այս ընթացքում կգտնվի Աբովյանի քրեակատարողական հիմնարկում: Այս մասին հայտնում է Aravot.am-ը:

Հիշեցնենք, որ 1995 թվականին ծնված այս երիտասարդը կասկածվում է ապօրինի զենք կրելու մեջ:

Ինչպես 3 օր առաջ պարզաբանեց Շիրակի մարզի դատախազ Կարեն Շահբազյանը. «Քրեական գործի նախաքննությամբ ապացույցներ էին ձեռք բերվել, դեպքից անմիջապես հետո, նա հայտնվել է դեպքի վայրում'փամփշտակալով և փամփուշտներով AK 74 տեսակի ինքնաձիգով»: Ավելի վաղ տեղեկացրել էինք, որ Գյումրու Շիրակացի փողոցում գտվող «Ցածր գներ» խանութի տեսախցիկը ֆիքսել է, թե ինչպես այս երիտասարդը, լսելով իր հոր վրա կրակելու մասին, մայկայով, դուրս է վազում տնից' իր հետ վերցնելով տանը գտնվող ինքնաձիգը:

Հիշեցնենք, որ Շիրակացի փողոցում հնչած կրակոցներն ու մարդասպանությունը տեղի ունեցավ հենց քավոր Հարութի տղայի պատճառով: Վերջինս նախագահական ընտրություններից առաջ Սլաբոդկա թաղամասում մետաղաձողով կոտրել էր Վարդան Ղուկասյանի եղբորորդու' 31-ամյա Նիկոլայ Ղուկասյանի գլուխը: Ու թեև այս փաստի առթիվ քրեական գործ էր հարուցվել, Ղուկասյանների որդիները որոշել էին անձամբ վրեժխնդիր լինել'օրը ցերեկով քաղաքի բանուկ հատվածում կրակոցներ արձակելով: Այդ կրակոցներից սպանվեց ԱԺ պատգամավոր Մարտուն Գրիգորյանի հանգուցյալ հորեղբոր թիկնապահն'36-ամյա Շեկոն, իսկ այդ նույն հորեղբոր' Սերոբի երեխաների կնքահայր քավոր Հարութը ծանր մարմնական վնասվածքներով, ոստիկանների հսկողության տակ պառկած է Գյումրու նորաբաց բժշկական կենտրոնում: