Բոսթոնի ահաբեկչության առեղծվածային Միշան Բաքվի ջարդերից ԱՄՆ փախած հայ է

Բոսթոնյան ահաբեկչության մեջ հիշատակվող ամենաառեղծվածային կերպարը՝ ոմն Միշան, որը, ինչպես նշում են, իսլամ ընդունած հայ է, ի վերջո հայտնվել է հանրությանը և հարցազրույց տվել The New York Review պարբերականին:

Ցարնաև եղբայրների հոր՝ Ռուսլան Ցարնիի կողմից հնչեցրած մեղադրանքները Միշայի հասցեին, թե նա է լվացել իր տղաների ուղեղները և վարակել արմատական իսլամի գաղափարներով, հարկադրեցին ԱՄՆ-ի հատուկ ծառայության և հետաքննությունների դաշնային բյուրոյի աշխատակիցների կողմից անցնել Միշայի ակտիվ որոնողական աշխատանքներին: ԱՄՆ-ի հատուկ ծառայությունները նույնիսկ հայտարարել էին, թե հայտնաբերել են նրա անձը, իսկ այսօր Միշան հարցազրույց է տվել և պատմել Ցանրաև ընտանիքի հետ իր ունեցած կապի մասին:

Այսպես, Միշան՝ նույն ինքը Միխայիլ Ալլահվերդովը, ով նույնպես իր ընտանիքով բնակվում է Բոսթոնում, հայտնել է, որ ինքը շփում է ունեցել ահաբեկիչներից ավագի՝ Տամերլան Ցարնաևի հետ: Միխայիլը նշել է, որ ինքը դավանափոխ մուսուլման է, որ շփվել է Տամերլան Ցարնաևի հետ, սակայն երբևէ նրան արմատական հայացքների չի դրդել, առավել ևս պայթյուններ իրականացնելու խորհուրդ չի տվել: «Ես նրա ուսուցիչը չեմ եղել: Եթե լինեի էլ, ապա երբեք նման հայացքներ չէի քարոզի»,-ասել է Ալլահվերդովը:

39-ամյա տղամարդը հայի և ուկրաինացու խառնուրդ է: Նա միջահասակ է, կարմրաշիկավուն մորուքով:

Ալլահվերդովը նշել է, որ Տամերլանի հետ ինքը ծանոթացել է Բոսթոնում, ուր նրան վերջին անգամ տեսել է 3 տարի առաջ: Ալլահվերդովը հրաժարվել է բնութագրել Տամերլանի բնավորությունը կամ որևէ կերպ որակել նրան: Ալլահվերդովը հաստատել է, որ ինքը հարցաքննվել է հետաքննությունների դաշնային բյուրոյի կողմից, և որ ինքը համագործակցում է հետաքննության հետ: «Ես նրանց տրամադրել եմ իմ հեռախոսը, իմ համակարգիչը, և պատասխանել եմ նրանց բոլոր հարցերին: Ինձ տեղեկացրել են, որ իմ գործը շուտով կփակվի»,-ասել է Ալլահվերդովը:

Բոսթոնի հետաքննությունների դաշնային բյուրոյի ներկայացուցիչը ոչ մի մեկնաբանություն չի տվել այս գործի կապակցությամբ, սակայն նրանք կարծես թե հաստատել են, որ Բոսթոնի ահաբեկչության հետ «Միշան» ոչ մի կապ չի ունեցել. գրում է պարբերականը:

Ալլահվերդովների ընտանիքն ԱՄՆ-ի տիպիկ միջին դասի էմիգրանտների ընտանիք է. տեղեկություններ է տալիս պարբերականը, նրա հայրը քրիստոնյա հայ էր, իսկ մայրը՝ ուկրաինուհի: Նրանց ընտանիքը ԱՄՆ էր ներգաղթել 1990-ականներին Ադրբեջանի Բաքու քաղաքից, որպեսզի փրկվի հայ քրիստոնյաների նկատմամբ այդ թվականներին Բաքվում կատարվող հալածանքներից: