«Պրաստիտուտկա»-ն վիրավորանք չէ՞

«Հանուն բարեխիղճ լրագրության» ֆեյսբուքյան խմբում տեղադրվել է տասնյակ լրագրողների հայտարարությունը, որում, մասնավորապես, ասված է.

«Այսօր Երևանի Աջափնյակ և Դավիթաշեն վարչական շրջանների ընդհանուր իրավասության դատարանի դատավոր Նաիրա Ավետիսյանը վճռեց մերժել «Ժողովուրդ» օրաթերթի և լրագրող Սոնա Գրիգորյանի հայց ընդդեմ «X գրուպի» սեփականատեր Խաչիկ Խաչատրյանի: «Ժողովուրդ»-ը Խաչիկ Խաչատրյանից պահանջում էր ընդամենը ներողություն խնդրել՝ լրագրողին վիրավորելու՝ «պրաստիտուտկա» անվանելու համար: Սակայն դատավորն իր կայացրած վճռով մեր՝ լրագրողների հետագա գործունեությունը ըստ էության դժվարացնում է, քանի որ այսուհետ ցանկացած գործարար կամ չինովնիկ կարող է վստահ լինել, որ իրեն հարց տալու համար լրագրողին կարող է հայհոյել, անպատվել ու մնալ անպատիժ:

«Հանուն բարեխիղճ լրագրության» ֆեյսբուքյան խումբը դիմում է ՀՀ ԱԺ պետաիրավական հարցերի մշտական հանձնաժողովի նախագահ Դավիթ Հարությունյանին, որպեսզի հանդես գա օրենսդրական փոփոխության առաջարկով: Անհրաժեշտ է, որ ՀՀ Քաղաքացիական օրենսգրքի 1087.1 հոդվածում տեղ գտած «հրապարակային վիրավորանք» ձևակերպումը չտարածվի լրագրողների վրա, որպեզի նրանց մասնագիտական գործունեության ժամանակ անհրաժեշտ հեռախոսազանգերը և ինֆորմացիա ճշտելու այդ ձևը դատարանի կողմից չհամարվի «անձնական զրույց»:

Հուսանք՝ գոնե այդ պարագայում դատարաններն ավելի խելամիտ կգտնվեն ու գործարարների կողմից լրագրողներին վիրավորելու փաստերը կհամարեն պատժելի արարք»: