Իրանի նախագահ Ահմադինեժադին մտրակի 74 հարված չի սպառնում. Իրանի կառավարություն

Իրանի կառավարության մամլո քարտուղարությունից հայտնում են, որ արևմտյան մի շարք ԶԼՄ-ներում հայտնված լուրերն այն մասին, թե Իրանի իսլամական հանրապետության նախագահ Մահմուդ Ահմադինեժադին մտրակի 74 հարված է սպառնում նախընտրական քարոզարշավի ժամանակ իրավախախտումների համար, չեն համապատասխանում իրականությանը. երկուշաբթի օրը հայտնում է IRNA գործակալությունը:

Ավելի վաղ լրատվամիջոցները հայտարարել էին, թե Իրանում նախընտրական քարոզարշավի ժամանակ սահմանադրության պահպանումը հսկող Վերահսկիչ խորհուրդը բողոք է ներկայացրել նախագահի դեմ, ով ուղեկցել է իր համախոհ Էսֆանդիյար Ռահիմ Մաշայիին նախագահական ընտրություններում իր թեկնածությունը գրանցելու ժամանակ, ինչը հակասում է օրենքին: Նման իրավախախտման համար Ահմադինեժադին կարող էր սպառնալ 74 մտրակի հարված. գրում է Telegraph-ը: 

Սակայն ինչպես հայտարարել է կառավարության ներկայացուցիչ Ղոլամ Հոսեյն Էլհամը, նախագահի վարքագծում ոչ մի իրավախախտում չի եղել, քանի որ նա գրանցմանը ներկա է գտնվել որպես մասնավոր անձ, այլ ոչ թե իբրև երկրի նախագահ: Բացի այդ, համաձայն օրենքի` նախընտրական քարոզարշավը մեկնարկված է համարվում միայն թեկնածուների ցուցակի հաստատումից հետո: