Սեդրակյանի ու Հայրիկյանի գործը բրազիլական սերիալ է. փաստաբան

Այսօր լրագրողների հետ հանդիպման ընթացքում Պարույր Հայրիկյանի մահափորձը կազմակերպելու մեջ մեղադրվող Վարդան Սեդրակյանի փաստաբան Ալեքսանդր Սիրունյանը տեղեկացրեց, որ Վարդան Սեդրակյանը դեռևս ցուցմունք չի տվել, և մամուլում հայտնված հրապարակումները, թե Սեդրակյանն արդեն ցուցմունք է տվել, չեն համապատասխանում իրականությանը։

«Վարդան Սեդրակյանն ընդհանրապես ցուցմունք չի տալիս, ինչի՞ մասին տա»,-հարց է բարձրացնում փաստաբանը:

Վերջինիս խոսքով՝ այս գործում բազմաթիվ թերություններ և անհասկանալի հանգամանքներ կան.

«Այս վեցհատորանոց գործից չենք կարողանում հասկանալ, թե որ մասով է մեղադրվում Վարդանը: Ես չեմ հասկանում՝ այսքան կարևոր գործով կիլլեր են ձերբակալում, գոնե մեկուսարան տանեն, տանում են հեռուստատեսությամբ են ցույց տալիս: Սա 1937 թվականը չէ, և մեկ ցուցմունքով մարդուն չեն դատում: Միակ ցուցմունքում նշվում է, որ կրակողը՝ կաֆելչի Սամվել Հարությունյանը, ասել է, որ Վարդանն իրեն հանձնարարել է վախեցնել Հայրիկյանին, սակայն ինքը պատահաբար կրակել է: Սա ևս մարդուն դատելու համար հիմք չէ»,-նկատում է փաստաբանը:

Վերջինս նաև կարծում է, որ այս հարցում պետությունը պատահականորեն սխալվել է, քանի որ, ըստ նրա, սա գործ չէ, սա սերիալ է՝ նույնիսկ ոչ թե հայկական, այլ բրազիլական:  «Համապատասխան մարմինները պետք է հասկանան՝ Եվրոդատարանը ոչ թե այս գործը հինգ-վեց տարի հետո ետ կուղարկի, այլ մի տարի հետո: Կբացեն, կտեսնեն՝ սա գործ չի, սա սերիալ է, ետ կուղարկեն»:

Լրագրողները հարցրին Սիրունյանին, թե իր խոսքերից կարելի է ենթադրել, որ այս գործով իրավապահ մարմինները ոչ պրոֆեսիոնալ են աշխատել, վերջինս պատասխանեց.

«Մեր դատաիրավական համակարգը լացելու իրավիճակում է»:

Հիշեցնենք, որ ՀՀ ԱԱԾ քննչական վարչությունը Վարդան Սեդրակյանին մեղադրանք է առաջադրել Քրեական օրենսգրքի 34-38-305 հոդվածներով: ՀՀ քրեական օրենսգրքի համաձայն՝ 34-րդ հոդվածով սահմանվում է հանցափորձը (Հանցափորձ է համարվում ուղղակի դիտավորությամբ կատարված այն գործողությունը (անգործությունը), որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով), 38-ով՝ հանցակիցների տեսակները և 305-ով՝ պետական, քաղաքական կամ հասարակական գործչի սպանությունը։

Վարդան Սեդրակյանին կալանավորել են մարտի 5-ին: Նա մեղադրվում է ԱԻՄ նախագահ Պարույր Հայրիկյանի դեմ մահափորձ պատվիրելու մեջ: