Զինվորի մահվան փաստով կալանավորվել է վաշտի հրամանատարը

Ապրիլի 19-ին՝ ժամը 11.40-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական դիրքում մահացու հրազենային վիրավորում էր ստացել և տեղում մահացել 1994թ. ծնված Րաֆֆի Լևոնի Մարաշլյանը:

Լուրեր.com-ի հետ զրույցում ՀՀ ՊՆ քննչական վարչության հասարակության հետ կապերի սպա Մերի Սարգսյանն ասաց, որ գործի շրջանակներում վաշտի հրապանատար Զ. Նազարյանին մեղադրանք է առաջադրվել 375 հոդվածի առաջին մասով (Հոդված 375. Իշխանությունը չարաշահելը, իշխանազանցությունը կամ իշխանության անգործությունը։ 1. Պետի կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը, ինչպես նաև իշխանության անգործությունը, եթե այդ արարքները կատարվել են շահադիտական, անձնական այլ շահագրգռվածությունից կամ խմբային շահերից ելնելով, և եթե դրանք էական վնաս են պատճառել՝ պատժվում են ազատազրկմամբ՝ երկուսից հինգ տարի ժամկետով)։

«Զ. Նազարյանը կալանավորվել է։ Նախաքննությունը շարունակվում է»,-ասաց Մերի Սարգսյանը։

Հիշեցնենք, որ զինվորի մահվան փաստով հարուցվել է քրեական գործ ՀՀ Քրեական օրենսգրքի 110 հոդվածի 1-ին մասի հատկանիշներով (ինքնասպանության հասցնել):