Ծրագրի ընդհանուր ֆինանսավորումը 56.2 մլն ԱՄՆ դոլար է

ՀՀ տրանսպորտի և կապի նախարարի առաջին տեղակալ Հրանտ Բեգլարյանն ընդունեց Համաշխարհային բանկի (ՀԲ) ներկայացուցիչներին՝ «Կենսական նշանակության ճանապարհային ցանցի բարելավման» ծրագրի ղեկավար Վիքրամ Քութարիի գլխավորությամբ:

Հանդիպման ժամանակ քննարկվեց «Կենսական նշանակության ճանապարհային ցանցի բարելավման» ծրագրի ուժի մեջ մտնելու պայմանների և առաջին տարվա աշխատանքների ընթացքը, ըստ որի՝ նախատեսվում է 73 կմ ընդհանուր երկարությամբ թվով 7 ճանապարհահատվածների վերականգնում:

Ընդգծվեց, որ ծրագրի հիմնական նպատակներից է՝ բարելավել գյուղական համայնքների շուկաների և ծառայությունների հասանելիությունը: Ծրագրով նախատեսված է ճանապարհների վերականգնման աշխատանքները իրականացնել 2013-2017թթ. ընթացքում:

Հրանտ Բեգլարյանը կարևորեց ծրագրի իրականացման ընթացքում հնարավոր խնդիրներին արագ արձագանքումը, հաստատեց նախարարության պատրաստակամությունը՝ աջակցելու բանկին և նոր ծրագրի շրջանակներում անել հնարավորը՝ այն արագ իրագործելու համար:

Ծրագիրը, որի ընդհանուր ֆինանսավորումը 56.2 մլն ԱՄՆ դոլար է, հիմնված է երկու բաղադրիչի վրա՝ կենսական նշանակության ճանապարհների վերականգնում և ծրագրի կառավարում:

Հանդիպման ընթացքում քննարկվեցին նաև Հայաստանում գործող ավտոկայանների վիճակի բարելավման հետ կապված մի շարք հարցեր: Հ. Բեգլարյանը նշեց, որ այսօր կարևոր է ավտոկայանները միջազգային չափանիշներին համապատասխանեցնելու խնդիրը և սպասարկվող ծառայությունների բարձր մակարդակի ապահովումը:

Կողմերն արդյունավետ համարեցին համատեղ ձևավորված համագործակցությունը, ինչը դրական ազդեցություն կունենա իրականացվող աշխատանքների ընթացքի վրա: