Հայաստան ավտոմեքենա ներկրողները

Հայաստանում գոյություն չունի ավտոմեքենաշինության ոլորտ: Դեռևս սովետական միության տարիներին Հայաստանում արտադրվում էր մի տեսակի ավտոմեքենա՝ ի դեմս «Երազ» մակնիշի, որն այսօր չի արտադրվում, քանզի չկարողացավ մրցունակ լինել սովետական այլ ավտոմեքենաների հետ՝ էլ չասած միջազգային ավտոմեքենաների մասին:

Հայաստանը չունի ավտոմեքենաների սեփական արտադրությունը, սակայն կարելի է արձանագրել, որ մեր երկիր են ներկրվում աշխարհահռչակ տարբեր մակնիշի ավտոմեքենաներ: Իսկ թե ովքեր են Հայաստան ներկրում արտասահմանյան տարբեր մակնիշի ավտոմեքենաներ, Slaq.am-ը ներկայացնում է ստորև.

 

Այսպիսով, ամենախոշոր ընկերություններից մեկը «Արմենիա Լադա»-ն է, որը հիմնադրել է Ռաֆայել Շահմուրադյանը: Նրա ողբերգական սպանությունից հետո այդ ընկերությունը, որը ներկայումս կոչվում է «Կարկոմավտո» ՍՊԸ, ղեկավարում են երկու որդիները՝ Կարեն և Աշոտ Շահմուրադյանները, ովքեր բարձրագույն կրթություն են ստացել եվրոպական լավագույն համալսարաններում: Իրենց հոր մահից հետո նրանք վերադարձան Հայաստան և սկսեցին ղեկավարել հոր բիզնեսը: Ինչպես ժամանակն է ցույց տալիս, նրանք կարողացան պահպանել իրենց հոր ստեղծածը և այսօր էլ ընկերությունը արագ տեմպերով առաջ է գնում: Այս ընկերությունը Հայաստան է ներկրում անգլիական աշխարհահռչակ «Range Rover», ֆրանսիական «Peugeot», «Chevrolet», «Nissan» և «Renault» մակնիշի ավտոմեքենաները: Բացի այդ, Հայաստանում ստեղծել են ավտոմեքենաների հսկայական սերվիս համակարգ:

 

Հայաստան ավտոմեքենաներ ներկրող մյուս խոշոր ընկերությունը պատկանում է Գագիկ Ծառուկյանին: Այն «Մուլտի մոթորս» ընկերությունն է, որը Հայաստան է ներկրում «Hyundayi» և գերմանական «Opel» մակնիշի ավտոմեքենաները, բացի այդ էլ հանդիսանում է ռուսական «Լադա» մակնիշի ավտոմեքենայի պաշտոնական ներկայացուցիչը Հայաստանում: Պետք է նշել, որ մինչ երկար տարիներ «Լադա»-ի ներկրողը Հայաստան հանդիսանում էր «Արմենիա Լադա» ընկերությունը, սակայն Ռաֆայել Շահմուրադյանի մահից հետո այս իրավունքը նրա որդիները զիջեցին Գագիկ Ծառուկյանին: «Մուլտի մոթորս» ընկերությունում բաժնեմաս ունի նաև Ռուսաստանի հայերի միության նախագահ Արա Աբրահամյանի եղբայրը՝ Արմեն Աբրահամյանը:

Հայաստանում ներկայացված են նաև աշխարհի ամենահռչակավոր ավտոմեքենաներից մեկը՝ Mercedes-ի ներկայացուցիչը Հայաստանում «Ավանգարդ մոթորս»-ն է, որի սեփականատերն է «Մարտունեցի Էդո» մականունով հայտնի ռուսաստանահայ գործարարը: Նրան էր պատկանում նաև նախկին «Կուկուռուզնիկ»-ի շենքը, որտեղ պատրաստվում է կառուցել նոր հյուրանոցային համալիր: «Mercedes»-ը ևս Հայաստանում ներկայացված է բարձր մակարդակով:

Հայաստանում ներկայացված է նաև գերմանական մյուս խոշորագույն ընկերությունը՝ «BMW»-ն, որի ներկայացուցիչն է «Եվրոմոթորս» ՍՊԸ-ն: Այն պատկանում է Հայրապետյան եղբայրներին, ովքեր Հայաստանում ունեն նաև մի շարք այլ բիզնեսներ:

Մյուս գերմանական խոշոր ավտոընկերության՝ «Audi»-ի ներկայացուցիչը Հայաստանում «Սլավ մոթորս» ընկերությունն է, որը պատկանում է Համբարձումյանների ընտանիքին՝ ԱԺ պատգամավոր Արմադի Համբարձումյանի (Դերժավայի Արկադ) գլխավորությամբ:

Հայաստանում ներկայացված է նաև «Volkswagen» ապրանքանիշը, որի պաշտոնական ներկայացուցիչն է «Երևան» ՀԸ և «Էլիտ Շանթ» ընկերության նախագահ Վարշամ (Յուրա) Ղարիբյանը:

 

Հայաստանում ներկայացված են նաև ճապոնական խոշորագույն ավտոմեքենաները՝ «Toyota»-ն, որն ի դեմս «Տոյոտա Երևան» ՍՊԸ-ի ներկայացնում է Հ2 հեռուստաընկերության և ԵՊԲՀ-ի նախկին ռեկտոր Գոհար Քյալյանի ամուսինը՝ Սամվել Մայրապետյանը, ում պատկանում են մի շարք այլ բիզնեսներ՝ մասնավորապես՝ Հյուսիսային պողոտայի մի ստվար հատվածի շենքերը: «Toyota»-ն Հայաստանում ամենաշատ վաճառվող մակնիշներից է: Այն նաև մասնակցում և հաղթում է պետական տենդերներում: Մասնավորապես՝ հաղթել է Ճանապարհային ոստիկանության սպասարկման ոլորտում և ՃՈ ավտոմեքենաները հիմնականում հենց այս մակնիշի են: «Տոյոտա Երևան» ՍՊԸ-ն Հայաստանում ներկայացնում է նաև «Lexus» մակնիշի ավտոմեքենաները:

Հայաստանում պաշտոնապես ներկայացված է նաև «Mazda» ընկերությունը: Այն ներկայացնում է «Թոփ Մոթորս» ընկերությունը, որի սեփականատերերը երիտասարդ գործարարներ են, ովքեր իրենց աշխատասիրությամբ կարողացան այս ապրանքանիշը պատշաճ մակարդակով ներկայացնել Հայաստանում: Այդ ընկերութան սեփականատերն է Միսակ Սարգսյանը, ով անդամագրվեց «Օրինաց երկիր» կուսակցությանը, սակայն հետագայում ունենալով որոշակի խնդիրներ, ըստ որոշ տեղեկությունների խաբված զգալով իրեն՝ դուրս եկավ այս կուսակցությունից:

Հայաստանում «Kia motors Armenia» ընկերությունը ներկայացնում է «Kia» մակնիշի ավտոմեքենաները: «Kia motors Armenia»-ն պատկանում է «Գլենդել Հիլզ»-ի սեփականատեր Վահե Յակուբյանին: Նա սփյուռքահայ խոշոր գործարար է, ով Հայաստանի անկախացումից հետո վերադառնալով հայրենիք՝ այստեղ հիմնադրեց մի շարք բիզնեսներ՝ այդ թվում նաև «Կիա»-ի ներկայացուցչությունը:

 

Հայաստանում «Mitsubishi» մակնիշի ավտոմեքենաները ներկայացնում է «Մեգամոթորս» ընկերությունը՝ ի դեմս ՊԵԿ նախագահ Գագիկ Խաչատրյանի հարազատների: Այս ընկերությունը ևս Հայասանում ներկայացված է բարձր մակարդակով:

 

Բոլորովին վերջերս Հայաստանում բացվեց նաև ճապոնական «Honda» մակնիշի ավտոմեքենաների ներկայացուցչությունը, որի սեփականատերը «Գրանդ Հոլդինգ» ընկերության սեփականատերեր Կարեն և Միքայել Վարդանյաններն են: «Հոնդան» ևս համարվում է աշխարհահռչակ բրենդ և, կարելի է ասել, որ ճապոնական և կորեական ավտոմեքենաների մուտքը Հայաստան հաջողված է:

Հայաստանում ներկայացված է նաև չեխական «Skoda» ապրանքանիշը, որի սեփականատերը Հայաստանում «Դվին Կոնցեր»-ն է:

Հ.Գ. Քանի որ վերջերս շատ է խոսվում ՊԵԿ նախագահ Գագիկ Խաչատրյանի հարազատների՝ բիզնես ոլորտում գտնվելու մասին, պետք է նկատել, որ այս ոլորտում ևս Գագիկ Խաչատրյանի հարազատները ներկայացված են, սակայն ուսումնասիրելով այս բնագավառը՝ կարելի է հանգել մի պարզ ճշմարտության. այս ոլորտում Գագիկ Խաչատրյանի հարազատները՝ Mitsubishi ապրանքանիշով մրցակցում են կոնկրետ ավտոմեքենաների բրենդների հետ, այլ ոչ թե նրանց սեփականատերերի և որևէ շահեկան դիրք չունեն հայաստանյան ավտոմեքենայի շուկայում: Ուսումնասիրելով պետական տենդերների հատվածը՝ պետք է նկատել, որ «Mitsubishi»-ն չի շահել որևէ պետական տենդեր՝ ի տարբերություն «Toyota»-ի, «Kia»-ի և այլ մակնիշների: Սա ապացուցում է այն հանգամանքը, որ պարտադիր չէ՝ բարձրաստիճան պաշտոնյան օգտագործի իր ռեսուրսները արտոնյալ պայմաններ տալու համար:

Նյութը՝ Slaq.am -ի