Րաֆֆի Հովհաննիսյանի պայքարը շարունակվում է՝ նույնիսկ ԱՄՆ–ում

Րաֆֆի Հովհաննիսյանը Լոս Անջելեսի իր համակիրներին վստահեցնում է, որ պայքարը շարունակվում է, և ամենաուշը հինգ տարի հետո Հայաստանը դառնալու է վերադարձի, արդարության, օրենքի երկիր:

«Պայքարը շարունակվելու է մինչև հաղթանակ»,- իր ելույթում հավաքվածներին վստահեցրեց նախագահի նախկին թեկնածու Րաֆֆի Հովհաննիսյանը, ով մեկ շաբաթ է, ինչ գտնվում է Լոս Անջելեսում և հանդիպումներ է ունենում իր համախոհների հետ:

Րաֆֆի Հովհաննիսյանի նախաձեռնած «Բարև, Լոս Անջելես» միջոցառումը Գլենդելում գտնվող մի բացօթյա ընդարձակ սրճարանում էր, որի մուտքն արժեր քսան դոլար: Ամերիկահայ երաժշտական խմբերի նվագակցության ներքո Րաֆֆի Հովհաննիսյանը մեկ առ մեկ բարևեց խորտիկներով սեղանների շուրջ նստած ներկաներին, լուսանկարվեց, առանձին զրույցներում վերհիշեց հետընտրական օրերը և ապա իր ելույթի ընթացքում կոչ արեց ներկաներին անմասն չմնալ և միանալ պայքարին:

«Թող մեզ ոչ մի տեղ բացակա չդնեն՝ Մոսկվայում, Անկարայում թե Երևանում»,- ասաց Հովհաննիսյանը:- «Պիտի միանանք և պիտի փոխենք մեր երկիրը, ուժեղացնենք, դարձնենք հաղթական երկիր»:

Նշենք, որ Րաֆֆի Հովհաննիսյանին լսելու էին եկել շուրջ երեք հարյուր հոգի, որոնց մեծամասնությունը երիտասարդներ էին:

Նրան սատարելու էր եկել նաև ամերիկացի հայտնի իրավապաշտպան Թեդ Հեյսը, ով իր ելույթում ասաց, թե «առաջին քրիստոնյա երկիրը այսօր ունի ընդամենը երկու միլիոն բնակչություն և տասը միլիոն սփյուռք». - «Ժամանակը եկել է, դուք քաղելու եք ձեր չարչարանքի արդյունքը»:

«Ազատություն» ռադիոկայանի հետ զրույցում Րաֆֆի Հովհաննիսյանն ասաց, որ միջոցառման նպատակն էր ցույց տալ այստեղ ապրող հայերին, որ քաղաքացիական շարժումը «ուժի մեջ է», «չի մարել, և պայքարը տեւական է»:

Հարկ է նշել, որ այս միջոցառումը չլուսաբանվեց տեղական որևէ հեռուստաընկերության կողմից, թեև Լոս Անջելեսում գործում են շուրջ մեկ տասնյակ հայկական հեռուստաընկերություններ:

Պատասխանելով հարցին, թե ինչպես է վերաբերում «Բարգավաճ Հայաստան» կուսակցության հայտարարությանը, թե կարող են հրապարակել իր և Գագիկ Ծառուկյանի հանդիպման ձայնագրությունը՝ Րաֆֆի Հովհաննիսյանն ասաց, թե ոչ միայն դեմ չէ, այլև պահանջում է հրապարակել. - «Հրապարակեք և կտեսնենք, թե ով է ճշմարիտն ասում, ով՝ չէ»:

Լուսինե Մուսայելյան, Լոս Անջելես