Պուտինի ամուսնալուծությունը չի անդրադառնա նրա վարկանիշի վրա. քաղաքագետներ

ՌԴ նախագահ Վլադիմիր Պուտինի և նրա կնոջ՝ Լյուդմիլա Պուտինայի ապահարզանը, որի մասին նախօրեին հայտարարել է նախագահը, չի անդրադառնա կամ նույնիսկ դրական կարող է անդրադառնալ պետության ղեկավարի հեղինակության վրա, քանի որ Պուտինը ոչինչ չի թաքցրել իր հայրենակիցներից և ազնիվ է գտնվել նրանց հետ. կարծում են քաղաքագետները, մեջբերում է Взгляд-ը:

«Եթե ապահարզանը որևէ կերպ անդրադառնա էլ Պուտինի վարկանշի վրա, ապա միայն դրական առումով, քանի որ Ռուսաստանը աշխարհիկ պետություն է, և ապահարզանը մեզ մոտ տարածված երևույթ է, որի միջով անցել են շատերը: Դա ավելի կմոտեցնի նախագահին հասարակ քաղաքացիների հետ, ովքեր կարող են ասել` ահա նախագահը նույնպես ամուսնալուծված է, և դա սարսափելի չէ: Վերջին հաշվով՝ քաղաքականությունը ոչ մի կապ չունի դրա հետ: Սա Վլադիմիր Պուտինի անձնական գործն է»,-ասել է քաղաքագետ Եվգենի Մինչենկոն:

Հիշեցնենք, որ հինգշաբթի երեկոյան Վլադիմիր Պուտինն իր կնոջ հետ ներկա էր գտնվել «Էսմերալդա» բալետի ներկայացմանը, որից հետո տված հարցազրույցում նրանք հայտարարել էին ապահարզանի մասին: Նրանք կամուսանլուծվեն 30 տարի տևած ամուսնական կյանքից հետո: Նախագահն ու առաջին տիկինը այդ որոշումը բացատրում են այն հանգամանքով, որ արդեն վաղուց է, ինչ երկուսն էլ ապրում են առանձին կյանքով, իսկ նախագահի սուղ գրաֆիկի պատճառով օրերով չեն տեսնվում: