Նախարարն անտեղյակ է «Սպայկա»-ի գործունեությունից

ՀՀ գյուղատնտեսության նախարար Սերգո Կարապետյանն այսօր այցելեց գյուղմթերք ընդունող «Սպայկա» ընկերություն՝ ծանոթանալու ծիրանի մթերման գործընթացին։

Նախարարը եղավ ընկերության սառնարաններում, ուսումնասիրեց ծիրանի որակը, սառնարանային պայմանները: Խոշոր հրդեհից հետո «Սպայկա»-ի հին շենքը 4-րդ կարգի վթարային է, և այն պետք է քանդվի, այդ պատճառով ընկերությունը տեղափոխվել է նոր տարածք:

Լրագրողներից մեկը ընկերությունում նախարարին հարցրեց.«Ընդգծված վերաբերմունք կա «Սպայկա» ընկերության նկատմամբ ինչո՞վ է պայմանավորված»։ 

«Որովհետև «Սպայկա»-ն ամենախոշոր արտահանողն է և, եթե «Սպայկան» չաշխատի, մենք պրոբլեմներ կունենանք, այս տարի միայն 3700 տոննա կարտոֆիլ է մթերել այս կազմակերպությունը, այսինքն՝ մեր արտահանման ծավալների մոտավորապես կեսը ինքն է ապահովում, դրա համար էլ մենք հատուկ վերաբերմունք ունենք: Հայաստանում կան 25-30 արտահանող ընկերություն, անհատներ, ձեռներեցներ, մենք բոլորի հետ շփվում ենք, բոլորի հետ աշխատում ենք, բայց առանձնահատուկ՝ «Սպայկա»-ի հետ, որովհետև «Սպայկա»-ն շատ խոշոր, մեզ համար շատ կարևոր, գյուղատնտեսության համար կարևոր նշանակություն ունի:

Հարցին՝ հնարավոր է այդ ընդգծված վերաբերմունքում անձնական տարրեր կան, նախարարն ասաց. «Ինձ չի հետաքրքրում՝ ընկերությունն ում սեփականությունն է, ինձ հետաքրքրում է, որ ընկերությունը աշխատում է, գյուղատնտեսությանը օգուտ է տալիս, ինձ միայն դա է հետաքրքրում»:

Lurer.com-ի թղթակիցը նախարարին հիշեցրեց, որ անցած տարի այս նույն ընկերությունը գյուղացիներից հավաքել էր կեռաս, ծիրան, բալ և չեր կատարել համապատասխան վճարումները։ Գումարը հասնում էր 42.000.000 դրամի (Կարդացե՛ք՝ Բողոքի ակցիա. «Սպայկա»-ն շարունակում է խաբել գյուղացիներին (տեսանյութ)): Գյուղացիները հավաքվել էին Կառավարության շենքի մոտ և պատրաստվում էին թեկուզ ամեն օր բողոքի ակցիաներ անցկացնել, որպեսզի ետ ստանային իրենց ամբողջ տարվա աշխատանքի արդյունքը։ Հարցրինք նախարարին՝ ինչքանո՞վ վստահ լինենք, որ այս տարի ևս ուշացումներ չեն լինելու:

Նախարարն անակնկալի եկավ. «Անցյալ տարի՞, այդպիսի բան չի եղել, ես տեղյակ չեմ, ճիշտն ասած, այդպիսի բան չի եղել, անցյալ տարի շատ մեծ մթերում ենք կազմակերպել»,-ասաց նախարարը և հեռացավ: