Պետրոզավոդսկում ադրբեջանցին կրակ է բացել բանվորների վրա. վիրավորվել է մեկ հայ

Պետրոզավոդսկի ոստիկանությունը փնտրում է երկու տղամարդու, որոնք օգոստոսի 17-ին կրակ են բացել ճանապարհային աշխատակիցների վրա, ինչի հետևանքով վիրավորվել է ՀՀ քաղաքացի: Այս մասին հաղորդում է Interfax-ը՝ վկայակոչելով Կարելիայի ՆԳՆ մամուլի կենտրոնի իր աղբյուրներին:

Հաղորդվում է, որ օգոստոսի 17-ի երեկոյան երկու երիտասարդ մեքենայով մոտեցել են այն վայրին, որտեղ մի խումբ բանվորներ վերանորոգում էին ճանապարհային ծածկույթը: Վեճ է սկսվել, երբ աշխատավորները փակել են նրանց ճանապարհը: Տղամարդիկ հեռացել են, սակայն կարճ ժամանակ անց վերադարձել հրացանով:

Դուրս գալով մեքենայից՝ նրանք մի քանի անգամ կրակել են բանվորների վրա, իսկ հետո հեռացել: Հաղորդվում է, որ Հայաստանի 29-ամյա մի քաղաքացի ստացել է վնասվածքներ: Այնուամենայնիվ, հիվանդանոց տեղափոխելու անհրաժեշտություն չի եղել: Աղբյուրի տվյալներով՝ աշխատանքային ջոկատի բոլոր անդամները պաշտոնապես գրանցված են եղել և ունեցել են ժամանակավոր կացության իրավունք:

Դեպքի առիթով հարուցվել է քրեական գործ: Մեղադրյալներին սպառնում է մինչև 7 տարվա ազատազրկում: Այժմ հանցագործներին որոնում են: Նրանց ինքնությունը հաստատվել է: Հաղորդվում է, որ երկուսն էլ մոտ 25 տարեկան են: Նրանցից մեկը Պետրոզավոդսկի բնակիչ է, իսկ մյուսը՝ Ադրբեջանի քաղաքացի: Նշվում է, որ նրա ժամանակավոր կացության ժամկետը լրացած է եղել: