Ի՞նչ է թաքցնում «Արցախբանկը»

Թեժ իրավիճակ է ստեղծվել Դավիթաշեն համայնքի 2-րդ թաղամասում «Տոնուս» շինարարական ընկերության կողմից կառուցվող 44/4 բազմաբնակարան բնակելի շենքի (140 բնակարան) շուրջ: Խնդիրն այն է, որ այդ շենքի ապագա բնակիչները տարիներ շարունակ վճարել են բնակարանի ձեռքբերման համար անհրաժեշտ գումարը, եթե, իհարկե, այն չեն վճարել ամբողջությամբ՝ ակնկալելով, որ շինարարության ավարտին ստանալու են իրենց բնակարանները։ Սակայն, մինչ օրս նրանք չեն ստացել ո՛չ բնակարանը, ո՛չ էլ դրա սեփականության վկայականը: Նշենք, որ «Տոնուս» շինարարական ընկերությունը պատկանում է ԲՀԿ-ական նախկին պատգամավոր Աշոտ Տոնոյանին:

2013-ի սկզբին «Տոնուս»–ից շենքի ապագա բնակիչներին հայտարարել են, որ իրենք չեն կարող շինարարությունը շարունակել, քանի որ չունեն համապատասխան ֆինանսական միջոցներ, իսկ դեռևս անավարտ շենքը գրավ է դրված «Արցախբանկ» ՓԲԸ-ում, ինչի դիմաց «Տոնուս»–ը վարկ է ստացել «Արցախբանկ»–ից։

Բնակիչներն ավելի վաղ նամակով դիմել էին ՀՀ նախագահին, որտեղից ստացել են պատասխան, թե այս խնդրով զբաղվում է Ֆինանսների նախարարությունը, իսկ ՀՀ ֆինանսների նախարարի խորհրդական Հայկ Դավթյանը շահառուների հետ հանդիպման ընթացքում խորհուրդ էր տվել սպասել մինչ շինարարական ընկերության սնանկ ճանաչվելը՝ նշելով, որ որպես գերակա շահ՝ պետությունն աջակցելու է քաղաքացիներին: «Տոնուս» ընկերությունը հունիսի 15-ին սնանկ ճանաչվեց, իսկ Դավիթաշենի այգու դիմաց կառուցված շենքի սեփականատերերի հարցը մնաց առկախ:

Ըստ Լուրեր.com-ի տեղեկությունների՝ «Արցախբանկը» երկու անգամ վարկ է տրամադրել «Տոնուս»–ին՝ շենքի կառուցապատման աշխատանքներն ավարտին հասցնելու համար: Սակայն, երբ բնակիչները դիմել են «Արցախբանկ»–ին՝ մի քանի փուլով տրամադրված վարկի ընդհանուր գումարի մասին տեղեկություն տրամադրելու խնդրանքով, վերջինս մերժել է բնակիչներին: Ի դեպ, վարկի գումարի մասին հստակ տեղեկություն չի տրամադրում նաև «Տոնուս»-ը:

Ըստ մեր տեղեկությունների՝ հաջորդող գրավի պայմանագրով՝ «Տոնուս»-ին տրամադրվել է մոտ 2.400.000 ԱՄՆ դոլարին համարժեք ՀՀ դրամ: Նշենք նաև, որ վարկը տրվել է «Արցախբանկի» և Աշոտ Տոնոյանին պատկանող մեկ այլ ՍՊԸ-ի միջև կնքված պայմանագրով՝ մանկական սրճարան և ժամանցային կենտրոն կառուցելու համար, որը ևս մինչ օրս չի կառուցվել: Նույն աղբյուրների փոխանցմամբ՝ վարկառուն՝ այս դեպքում Աշոտ Տոնոյանը, վարկը մարելու համար ոչ մի գումար չի վճարել բանկին: Եվ առնվազն անհասկանալի է դառնում բանկի քաղաքականությունը՝ նմանօրինակ «անպարտաճանաչ վարկառուի նկատմամբ»: Հետևաբար, կարելի է ենթադրել, որ նրանք գործել են փոխհամաձայնեցված։ Արդյունքում, փորձ է արվում ավելի քան 140 ընտանիքների՝ տարիների ընթացքում կուտակած և դառը քրտինքով վաստակած գումարները յուրացնել «օրենքի սահմաններում»: