Տնտեսական համաժողով` Երևանում

Երևանի քաղաքապետի առաջին տեղակալ Կամո Արեյանը ներկա է գտնվել Երևանի քաղաքապետ Տարոն Մարգարյանի հրավերով Երևան ժամանած Մարսելի քաղաքապետ Ժան-Կլոդ Գոդենի գլխավորած պատվիրակության անդամների մասնակցությամբ կայացած ֆրանս-հայկական առևտրաարդյունաբերական պալատի և Հայաստանի տնտեսական զարգացման ֆորումի կազմակերպած տնտեսական համաժողովին: Մարսելի քաղաքապետ Ժան-Կլոդ Գոդենը իր ողջույնի խոսքում նշել է, որ ինչպես երկու երկրների, այնպես էլ Մարսելի ու Երևանի հարաբերությունները գնալով ընդլայնվում ու նոր նվաճումներ են արձանագրում:

«Շնորհակալություն եմ ուզում հայտնել Երևանի քաղաքապետ Տարոն Մարգարյանին` պաշտոնական հրավերի ու ջերմ ընդունելության համար: Սա մեր բարեկամությունն ընդլայնելու ու հետագա անելիքը նախանշելու ևս մեկ փայլուն հնարավորություն է: Ուրախ եմ, որ 2011 թվականին մենք պատիվ ունեցանք Ֆրանսիայում հյուրընկալելու ՀՀ նախագահ Սերժ Սարգսյանի գլխավորած պատվիրակությանը, իսկ 2012 թվականին Մարսելում հանդիպեցինք նաև Երևանի քաղաքապետ Տարոն Մարգարյանի հետ: Այժմ արդեն Երևանում քաղաքապետի հետ ստորագրեցինք համագործակցության նոր համաձայնագիր, որով փաստեցինք մեր աշխատանքները շարունակելու պատրաստակամությունը», - նշել է Մարսելի քաղաքապետ Ժան-Կլոդ Գոդենը:

Երևանի քաղաքապետ Տարոն Մարգարյանի անունից ողջունելով ներկաներին՝ քաղաքապետի առաջին տեղակալ Կամո Արևեյանը կարևորել է համաժողովի անցկացումը Մարսելի քաղաքապետի' Երևան կատարած այցի շրջանակում և նշել, որ Երևանի ու Մարսելի համագործակցությունն արդեն 2 տասնամյակի պատմություն ունի: Քույր քաղաքների միջև ձևավորվել են առևտրատնտեսական ու գիտամշակութային բազմակողմ հարաբերություններ: «Անցյալ տարի Երևանի քաղաքապետ Տարոն Մարգարյանի գլխավորած պատվիրակության Մարսել կատարած այցի ընթացքում տեղի ունեցան մի շարք հանդիպումներ, այդ թվում նաև ֆրանս-հայկական առևտրաարդյունաբերական պալատի հետ: Մի քանի ամիս անց կրկին հանդիպելու առիթ ընձեռվեց նաև Երևանում' երկրները մեկ հարկի տակ փառատոնի շրջանակում: Երևանի քաղաքապետարանը իր մասնակցությունն ունեցավ նաև Մարսելը 2013թ. Եվրոպայի մշակութային մայրաքաղաք հռչակվելու շրջանակներում գումարված համաշխարհային հայկական առևտրային ցանցի 3-րդ գլխավոր ասամբլեային»,- նշել է Կամո Արեյանը:

Քաղաքապետի առաջին տեղակալը հիշատակել է նաև Երևանի քաղաքապետ Տարոն Մարգարյանի մասնակցությամբ օրեր առաջ Վալանսում գումարված հայ-ֆրանսիական ապակենտրոնացված համագործակցության երկրորդ համաժողովը, որտեղ 2 երկրների տնտեսական համագործակցությունը նշվել է որպես գերակա ուղղություններից մեկը: Քաղաքապետի տեղակալի գնահատմամբ՝ նման համաժողովները նաև գործարար ծրագրեր քննարկելու մեծ հնարավորություն են ստեղծում: Կամո Արեյանն արդյունավետ աշխատանք է մաղթել նաև երևանյան համաժողովի մասնակիցներին և քաղաքապետի անունից վստահեցրել, որ Երևանի քաղաքապետարանը բաց է համագործակցության համար, իսկ քաղաքային իշխանությունները՝ պատրաստ շահագրգիռ կառույցներին ներկայացնելու մայրաքաղաքում առաջարկվող ներդրումային ծրագրերը:

Երևանի քաղաքետարանի տեղեկատվության և հասարակայնության հետ կապերի վարչություն